Minimum wage sa mga mambabatas itinulak 'para kahirapan maintindihan'
MANILA, Philippines — Matapos ang #CommuteChallenge na idinirehe sa tagapagsalita ng presidente matapos sabihing walang krisis sa transportasyon ang bansa, panibagong hamon naman ang itinutulak ngayon ng mga militante para maintindihan ng mga pulitiko ang danas ng karaniwang Pilipino.
Sa kanilang "minimum wage challenge," sinabi ni Gabriela Women's party-list Rep. Arlene Brosas na dapat itong maipatupad para malaman nila nang personal kung sapat ang kasalukuyang kita ng mga nasa laylayan para tugunan ang pang-araw-araw nilang pangangailangan.
MINIMUM WAGE FOR LAWMAKERS?
— The Philippine Star (@PhilippineStar) October 14, 2019
Rep.Arlene Brosas insisted that it is very important that these officials — who all enjoy millions, if not billions, in pork barrel funds (district allocations) — experience for themselves how it is to live through a hand-to-mouth existence. pic.twitter.com/11nocCcSkK
"Kahit ang senador at mga kongresista, minimum wage natin para nang sa ganoon, eksakto. Magkano ang pamasahe, magkano ang pangkain magkano ang lahat," ani Brosas sa ulat ng CNN Philippines.
Pahayag ng militanteng kongresista, malaki ang maitutulong nito upang mailapit ang kanilang sikmura at interes sa kanilang mga nasasakupan.
"Paano tayo magiging grounded kung doon pa lang sa pagsakay sa public transpo, hindi natin nagagawa?" dagdag ni Brosas.
Nasa Salary Grade 31 ang mga miyembro ng Kongreso, o sumusuweldo ng nasa P117,086 kada buwan bukod pa sa mga allowance na nakukuha nila.
Narito ang minimum na pasahod sa iba't ibang rehiyon ng bansa sa kasalukuyan, ayon sa National Wages and Productivity Commission:
- NCR: 500.00 - 537.00
- CAR: 300.00 - 320.00
- REGION I: 273.00 - 340.00
- REGION II: 320.00 - 360.00
- REGION III: 284.00 - 400.00
- REGION IV-A: 303.00 - 400.00
- REGION IV-B: 294.00 - 320.00
- REGION V: 310.00
- REGION VI: 295.00 - 365.00
- REGION VII: 313.00 - 386.00
- REGION VIII: 285.00 - 315.00
- REGION IX: 303.00 - 316.00
- REGION X: 331.00 - 365.00
- REGION XI: 381.00 - 396.00
- REGION XII: 290.00 - 311.00
- REGION XIII: 320.00
- BARMM: 270.00 - 280.00
Pagko-commute tuwing Lunes isasabatas?
Samantala, iminungkahi ng isang mambabatas na gawin nang pormal ang pagpapa-commute sa mga divisions chiefs, kalihim ng Gabinete at mga inihahalal na opisyal ng gobyerno tuwing Lunes.
Nababatikos ngayon ang ilang opisyal ng pamahalaan sa mga pahayag na "walang krisis sa transportasyon" dahil hindi naman daw nila alam ang totoong danas ng mga komyuter.
Ika-12 ng Oktubre nang sabihin ni Iligan Rep. Frederick Siao na ihahain niya ang Public Servants' Commuting via Public Transport Act sa Kamara.
"Kapag naisabatas po ito, makakaasa po ang publiko na mas mamadaliin naming mga government officials na solusyunan ang problema sa transportasyon," ani Siao.
Suggestion: Every Monday, all gov't vehicles used to sundo & hatid HIGH RANKING gov't officials would be grounded at their respective motor pools. That would already be thousands of gov't vehicles off the streets, enough to significantly decongest traffic. https://t.co/v6QvDVOnMc pic.twitter.com/ROvITXELR7
— Frederick Siao (@freddiesiao) October 12, 2019
Tuwing Lunes, maganda raw na mailagay sa mga motor pools ang mga sasakyang ginagamit pangsundo at paghahatid sa mga public officials.
"Etong mga ranking civil servants dapat pumili sa sumusunod: tricycle, jeepney, bus, FX/UVs, light rail, [Philippine National Rail] trains at TNVS units," dagdag niya sa Inggles.
"Kung gustong magbisikleta, pwede rin. Tuwing Monday lang naman."
Sa pamamagitan nito, libu-libong government vechicles na raw ang mawawala sa kalsada, na makatutulong sa pagpapaluwag nito.
Ikinatuwa naman ni Brosas ang plano ni Siao at sinabing pabor siya rito.
Paliwanag ni Brosas, na bahagi ng maka-Kaliwang Makabayan bloc, sanay naman ang mga gaya niya na mag-commute. — may mga ulat mula sa The STAR
- Latest
