Senado kakausapin ng Palasyo sa BBL

MANILA, Philippines – Nagpahayag ng kahandaan ang Malacanang na makipag-usap din ito sa miyembro ng Senado gaya ng ginawang pakikipag-usap ni Pangulong Benigno Aquino III sa mga kongresista ukol sa pagsusulong nitong maipasa ang Bangsamoro Basic Law (BBL), ayon kay PCOO Sec. Herminio Coloma Jr.

Sinabi ni Coloma na patuloy naman ang konsultasyon ni Pangulong Aquino sa lider ng Kamara at Senado upang ipaliwanag ang pangangailangang maipasa ang BBL sa itinakdang oras nito.

“Batid po nating lahat na mataas ang prayoridad na ibinibigay ni Pangulong Aquino at ng ating pamahalaan sa pagpasa ng Bangsamoro Basic Law. Antabayanan lang po natin kung mayroon po siyang ipatatawag na pagpupulong. Ang batid po natin ay patuloy ang kanyang konsultasyon at pakikipag-ugnayan sa mga lider ng Kongreso kabilang na ang mga lider ng Senado,” wika pa ni Coloma.