15-anyos na tinedyer sa Saudi Arabia, tinaguriang ‘pinakabatang journalist’ sa buong mundo!

ISANG teenager sa Saudi Arabia ang nakatanggap ng Guinness World Records dahil sa kanyang batang edad ay isa na siyang kolumnista sa dyaryo!

Kinumpirma kamakailan ng records keeping organization na Guinness World Records na si Ritaj Hussain Alhazmi ang bagong record holder ng titulong “Youngest Newspaper Columnist (Female)”.

Ito ay dahil sa edad na 15 ay nagsusulat na si Alhazmi sa pahayagang Arab News Pakistan, isang English newspaper na nakabase sa Saudi Arabia.

Sa kanyang column, sinusulat ni Alhazmi ang mga topic tulad ng kultura ng kanyang bansa, environmental issues at sustainability.

Bata pa lamang si Alhazmi ay mahilig na siyang magsulat ng mga kuwento. Noong siya’y 12-anyos, nakapagsulat na siya ng novel series at nakatanggap siya ng Guinness World Record title na “Youngest Person to Publish a Book Series (Female)” dahil dito.

Sa panayam kay Alhazmi, nais niyang ma­ging inspirasyon sa lahat at ipakitang hindi dapat maging hadlang ang edad sa pag-abot ng pangarap.