3 Leksiyon mula sa Hari

HABANG naghihingalo si Alexander the Great, may tatlo siyang kahilingan sa kanyang magigiting na heneral.

“Una, ang aking mga doktor lamang ang magdadala ng aking kabaong patungo sa aking libingan. Pangalawa,  ihanay ninyo sa gilid ng daan patungong libingan ang mga ginto at pilak na aking kinita at naipon. Pangatlo, ibubuka ninyo ang aking mga palad at ilalaylay ang mga ito sa labas ng aking kabaong.”

Lihim na nagkatinginan ang mga heneral. Bakit weird ang kahilingan ng kanilang hari? May isang naglakas-loob magtanong kung bakit iyon ang gusto niyang mangyari? Kahit hinihingal na ay nakuha pa rin magpaliwanag ng hari.

“Una, nais kong ipakita at maisip ng mga tao na kahit anong galing ng isang manggagamot, wala silang magagawa kung nais nang kunin ni Kamatayan ang kanilang pasyente.

Pangalawa, gusto kong ihanay sa daan ang lahat ng aking kayamanan upang ipakita sa mga tao na hindi ko madadala sa kabilang buhay ang lahat ng aking pinaghirapan. Napakalungkot ng katotohanan na halos magpakamatay  ako sa paghahanapbuhay para lang makamtan ang lahat ng yaman sa mundong ito ngunit hindi ko pala madadala ang lahat ng ito sa aking libingan.

Pangatlo, gusto kong nakabuka at nakalaylay sa labas ng kabaong ang aking mga kamay upang maisip ng lahat na dumating tayo sa mundong ito na walang yaman at lilisan din na walang laman ang mga palad.”

Pagkaraang magsalita ay hinugot ng hari ang huli niyang hininga. Hinayaan na lang niyang talunin siya ni Kamatayan.