Roque, laya na sa detention facility ng Kamara

MANILA, Philippines — Matapos patawan ng contempt dahil sa pagsisinungaling, pinalaya na rin si dating Presidential Spokesperson Harry Roque makaraan ang 24-oras na pagkakakulong sa Kamara de Representantes.

Ang paglaya ni Roque kamakalawa ng gabi ay kinumpirma ni House Secretary General Reginald Velasco matapos itong ipaabot sa kaniya ni House Sergeant at Arms Napoleon Taas.

Si Roque ay naditine noong Huwebes ng gabi matapos magsinunga­ling sa Quad Committee (Quad Comm) ng Kamara na mayroon umano siyang dinaluhang pagdinig noong Agosto 16, Biyernes sa Manila Regional Trial Court (RTC) pero nadiskubreng hindi ito totoo.

Ikinatwiran naman ni Roque na “honest mistake” lamang ito matapos umano siyang malito. Gayunman, hindi ito tinanggap ng komite kaya siya na-cite in contempt at pinarusahan na makulong ng 24 oras sa Kamara.

Si Kabayan Party­list Ron Salo, mortal na kaaway ni Roque ang
nagmosyon para ma-contempt ang huli matapos makakuha ng sertipikasyon sa Manila RTC na wala siyang dinaluhang paglilitis ng nasabing araw taliwas sa kanyang alibi o dahilan.

Nagbabala si Surigao del Norte 2nd District Rep. Robert Ace Barbers, chairman ng Quad Comm na mahaharap sa mas mabigat na parusa si Roque kung muling gagawa ng “contemptible acts” gaya ng muling pagsisinungaling sa mega panel ng Kamara.