Pusher tiklo sa P9.6 milyong marijuana

MANILA, Philippines — Isang lalaki na umano ay bigtime drug pusher ang naaresto ng mga tauhan ng Philippine National Police Drug Enforcement Group (PNP-DEG) sa isang buy-bust kahapon ng umaga sa Valenzuela City.

Kinilala ni PNP-DEG Director PBGen. Eleazar Matta, ang naarestong suspek na si alyas “Rich”, 49 at nasamsam ang nasa P9.6 milyon ang halaga ng pinatuyong dahon ng marijuana

Sa imbestigasyon, ikinasa ng Special Operations Unit NCR at Intelligence and Foreign Liaison Division ng PNP-DEG ang buy-bust operation, alas-9:00 ng umaga sa KM17 Drive and Dine NLEX Southbound Brgy. Canumay West, Valenzuela City.

Una nang nagsagawa ng surveillance ang mga operatiba laban sa kilos ng suspek hanggang sa itakda ang anti-illegal drug operation at nakuha ang nasa 80,000 gramo ng pinatuyong dahon ng marijuana.