PDEA Academy itatayo sa Tanay, Rizal

MANILA, Philippines — Sisimulan nang itayo ang nasa P1.56 bilyong halaga ng PDEA (Philippine Drug Enforcment Agency) Academy sa Tanay, Rizal.

Mismong ang Pangulong Ferdinand “Bongbong” Marcos, Jr. ang nanguna sa isinagawang ground-breaking ceremony sa konstruksiyon ng PDEA Academy sa 11 ektarya sa Sitio Tablon, Barangay Cuyambay, Tanay, Rizal.

Ayon kay PDEA chief Moro Virgilio Lazo, ang PDEA Academy ay isang state of the art facilities na layong matutukan ang pag-aaral, pagsasaliksik at pagsasanay ng mga drug law enforcers. 

 Itatayo ang PDEA Academy sa isang eco-tourism destination tulad ng Tanay, Rizal kaya nakatitiyak na gagamit ang “green buildings” ng renewable energy.

Bukod sa recruitment at pagsasanay ng mga drug enforcement officers, magbibigay rin ang PDEA Academy ng scholarships at programa tungkol sa anti-drug laws at research.

Magsisilbi rin itong lugar para sa physical conditioning at fitness exercises; combat shooting at marksmanship ng PDEA personnel.

Ang 10 ektaryang PDEA Academy na nagkakahalaga ng P1.56 bilyon ay mula sa Usufructuary Agreement sa local government ng Tanay, Rizal noong Marso 2021.