Sobrang selos…. bebot tinarakan ng live-in, tigok
MANILA, Philippines - Bunsod ng matinding selos, binurdahan ng saksak ng isang lalaki ang kanyang live in partner sa loob ng kanilang kuwarto sa lungsod Quezon, ayon sa ulat ng pulisya kahapon.
Ang biktima ay nakilalang si Aikie Ramento, 20, service crew ng isang fast food chain na nasawi dahil sa mga tama ng saksak sa kanyang katawan habang ang suspek naman na si Edmar Tangonan, 22 ay ginagamot sa Labor Hospital dahil sa tama rin ng saksak.
Sa imbestigasyon, nangyari ang insidente sa tinutuluyan ng dalawa sa No. 52 Camp Bridge St., Brgy. E. Rodriguez, Cubao, ganap na alas-2 ng madaling araw, kung saan narinig na lang ng nanay ng biktima na si Aling Marilyn ang malakas na sigaw ng paghingi ng tulong nito.
Dito ay nakita ni Aling Marilyn na pinagsasaksak ng suspek ang biktima, tinangka pa umanong tumakbo ng biktima palayo sa suspek ngunit bumagsak na ang katawan nito pagsapit sa pintuan.
Sabi ng pulisya, selos ang ugat ng pananaksak ng suspek sa biktima dahil nagdududa umano ang una na may kinalolokohang ibang lalaki ang huli. Patuloy ang imbestigasyon ng pulisya sa nasabing insidente.
- Latest
