France tumukod sa Germany sa VNL Week 3

MANILA, Philippines — Inilista ng Germany ang kanilang ikalawang sunod na panalo matapos pabagsakin ang France, 25-23, 25-27, 25-20, 25-23, sa Pool 6 Week 3 ng Men’s Volleyball Nations League kahapon sa Mall of Asia Arena sa Pasay City.

Pumalo si opposite hitter György Grozer ng 21 points mula sa 18 attacks, isang block at dalawang service aces para sa 4-5 record ng mga Germans na umakyat sa No. 9 spot sa VNL standings.

Nagdagdag si Moritz Reichert ng 11 points para palakasin ang kanilang tsansa sa VNL Finals na nakatakda sa Lodz, Poland sa susunod na linggo.

Binanderahan ni Jean Patry ang mga Frenchmen sa kanyang 19 points buhat sa 16 attacks, isang block at dalawang service aces at may 16 at 10 markers sina Trevor Clevenot at Yacine Louati, ayon sa pagkakasunod.

Matapos maiwanan sa 1-2 ay pinilit ng France na makatabla sa laro nang idikit sa 23-23 ang iskor sa fourth set matapos ang setting error ni Maase sa panig ng Germany.

Dalawang sunod na hataw naman nina Reichert at Grozer ang tuluyan nang sumelyo sa panalo ng mga Germans.