MANILA, Philippines — Hulaan pa rin kung makakalaro na si reigning MVP Angel Canino sa pagsagupa ng De La Salle University sa University of Santo Tomas sa UAAP Season 86 women’s volleyball tournament.
Paglalabanan ng defending champions Lady Spikers at Golden Tigresses ang natitirang ‘twice-to-beat’ incentive, magsisimula ang kanilang paluan ngayong alas-6 ng gabi sa Smart Araneta Coliseum.
Makakakuha ng bonus ang top two teams matapos ang 14-game elimination round at nakuha na ng National University Lady Bulldogs ang isa matapos walisin ang second round at hawakan ang No. 1 seed sa kartang 12-2.
Magkasalo sa No. 2 spot sa team standings ang DLSU at UST na may parehong 11-2 record at mahalaga ang kanilang huling laro sa elims.
Limang larong hindi pumalo para sa Taft-based squad si Canino, kaya umaasa ang mga fans na makakalaro na siya sa napakahalagang laban.
“Maganda naman iyong progress ng recovery niya (Canino). So far, nagte-therapy naman na siya. Hopefully, makabalik talaga siya kung hindi man sa game sa UST, sa semis,” sabi ni Lady Spikers’ deputy coach Noel Orcullo.
Si sophomore star Shevana Laput ang pinaghuhugutan ng La Salle ng opensa habang hindi nakakalaro si Canino at nagtala ng 20.4 points per game average.
“She’s my batchmate, (Canino). I need to step up for her and do justice for her” ani Laput.
“Personally, I’m playing for the both of us right now. I always say to her, ‘this is also yours,’” dagdag pa ni Laput, nakababatang kapatid ni PBA center James Laput ng Magnolia Hotshots.
Samantala, magkakaldagan sa alas-12 ng tanghali ang mga laglag nang University of the Philippines Lady Maroons at University of the East Lady Warriors.