Pagulayan pasok sa Last 16 Chris Co
MANILA, Philippines — Nagparamdam agad si 2004 World 9-Ball titlist Alex Pagulayan para makahirit ng tiket sa Last 16 ng prestihiyosong 2019 World Pool Masters sa Victoria Stadium sa Gibraltar.
Hindi hinayaan ng Filipino-Canadian cue master na makaporma si world champion Wu Jiaqing ng China matapos itarak ang 7-4 desisyon sa first round.
Naisaayos ni Pagulayan ang pakikipagtipan kay Ko Pin Yi ng Chinese-Taipei na nakakuha ng opening round bye dahil sa mataas na ranking sa World Pool-Billiard Association.
Bigo naman ang isa pang Pinoy na si Jeffrey de Luna matapos lumasap ng 2-7 kabiguan kay 2016 World 9-Ball titlist Albin Ouschan ng Austria.
Pasok din sa Last 16 sina Fedor Gorst ng Russia, David Alcaide ng Spain, Klenti Kaci ng Albania, Shane Van Boening ng Amerika, Justin Sajich ng Australia at Matt Edwards ng New Zealand.
Iginupo ni Gorst si Naoyuki Oi ng Japan (7-2), tinalo ni Alcaide ang kababayang si Francisco Sanchez-Ruiz (7-3), ginulantang ni Kaci si Earl Strickland ng Amerika (7-2), pinatumba ni Van Boening si Kelly Fisher ng Great Britain (7-2), pinatalsik ni Sajich si Petri Makkonen ng Ireland (7-4) at sinorpresa ni Edwards si Chris Melling ng Great Britain (7-3).
- Latest
