Delos Santos at Suazo bumandera sa Lucena leg ng Milo
LUCENA, Philippines -- Muling ipinakita ni two-time Milo Marathon Queen Mary Grace Delos Santos ang kanyang dominasyon nang pangunahan ang 21-kilometer women’s division ng 39th National Milo Marathon dito kahapon.
Nakiisa sa halos 11,500 runners si Lucena City Mayor Roderick Alcala at sina celebrities Joross Gamboa, Katya Santos, Jaycee Parker, Jamille Obispo at Zara Lopez na tumakbo sa 5K race.
Nagposte si Delos Santos, miyembro ng Philippine Air Force, ng tiyempong 01:13:23 para ungusan sina Janice Tawagin (01:38:56) at Jeanyrose Hari (01:47:39).
Bumandera naman sa men’s category si Ruel Suazo nang maglista ng oras na 01:13:23 para talunin sina Alley Quisay (01:15:49) at Nimrod Cesar (01:19:26).
Ang 23-anyos na si Suazo ay tumapos na third placer sa nakaraang Milo National Finals.
Dahil sa kanilang panalo ay nakamit nina Delos Santos at Suazo ang tiket para sa 2015 Milo National Finals.
Nakataya sa 2015 Milo National Finals sa Disyembre 6 sa Angeles ang Milo Marathon King at Queen titles.
Ang mga hihiranging Milo King at Queen ay ipapadala sa United States para sa tsansang makalahok sa 2016 Boston Marathon.
Mula sa Lucena ay dadalhin ang Milo qualifying legs sa Iloilo (September 20), Bacolod (Setyembre 27), Tagbilaran (Oktubre 4), Cebu (Oktubre 11), General Santos (Oktubre 18), Davao (Nobyembre 8), Butuan (Nobyembre 15) at Cagayan De Oro (Nobyembre 22).
- Latest
