Soltones di napigilan ng JRU
MANILA, Philippines – Hindi napigilan ng Jose Rizal University ang pamamayagpag ni Gretchel Soltones nang banderahan niya ang San Sebastian sa 25-18, 20-25, 25-18, 25-23 panalo para makasalo sa liderato sa 90th NCAA women’s volleyball tournament kahapon sa The Arena sa San Juan City.
Humataw si Soltones, beterano ng Shakey’s V-League, ng 32 hits para sa panalo ng Lady Stags kontra sa Lady Bombers.
Ito ang ikaapat na sunod na panalo ng San Sebastian para makasosyo ang Arellano sa liderato.
Nagdagdag sina Nikka Dalisay at Jolina Labiano ng 15 at 11 points, ayon sa pagkakasunod, para ipalasap sa Jose Rizal ang pangatlong kabiguan nito sa limang laro.
Sa isa pang laro, inilista ng Mapua ang kanilang unang panalo nang gibain ang Letran, 25-22, 25-13, 22-25, 25-15.
Nagtala sina Jela Pena, Audrey Paran at Dianne Latayan ng 18, 17 at 11, ayon sa pagkakasunod, para sa Lady Cardinals, hangad mapaganda ang kanilang ninth place finish noong nakaraang season.
- Latest
