Paul Lee pumirma na ng kontrata sa Rain or Shine

MANILA, Philippines - Bago bumiyahe patu­ngong Incheon, South Korea para samahan ang Gi­las Pilipinas sa kam­pan­ya sa 17th Asian Games ay inayos muna ni Paul Lee ang kanyang da­pat ayusin.

Sa wakas ay nakipag-usap si Paul Lee sa Rain or Shine upang ayusin ang anumang gusot sa pagitan niya at ng kanyang team na nagbigay daan para mag­karoon ng kasunduan para sa kanyang paniba­gong kontrata sa Elasto Pain­ters.

Imbes na isang three-year deal ay nakipagnegosasyon uli ang kampo ng kontrobersiyal na player pa­ra sa dalawang taong kontrata na nagkakaha­laga ng P10.08 milyon ka­hapon.

Sa likod ng malawa­kang pagbaha sa Kamay­nilaan at sa masamang pa­nahon, sumugod ang 6-fot-1 na si Lee sa opisina ng Rain Or Shine kasama ang kanyang manager na si  Lawrence Chongson para makipagkita kay Mamerto Mondragon, ki­natawan ng Rain or Shine sa PBA Board of Governors.

Ang unang alok ng Rain or Shine ay isang three-year, P15.1 million deal na may maximum monthly salary na P420, 000.00.

Ngunit tumawad ang kampo ni Lee at pinagbigyan naman ito ng Rain Or Shine.

“They have a valid rea­son, they said that the ma­ximum salary might go up again after two years. So they’re keeping that op­tion open,” ani Mon­dra­gon.

Nagsimula ang isyu kay Lee nang hilingin ni­ya kay coach Yeng Guioa na i-trade siya  at hindi agad nagpakita sa practice ng team nang dumating siya mula sa kampanya ng Gilas sa World Cup sa Spain.

Kamakailan ay naki­pagkita siya kay Guiao upang ayusin ang proble­ma.