4-teams nais sumalo sa liderato

Laro Ngayon

 (Ynares Sports Arena, Pasig City)

12 n.n. – Café France vs Blackwater Sports

2 p.m. – Jumbo Plastic vs Hogs Breath

4 p.m. – Boracay Rum vs Informatics

MANILA, Philippines - Apat na koponan ang mag-uunahan sa pagsalo sa maagang liderato habang ang dalawa ay nagnanais na bumangon mula sa pagkatalo sa pagpapatuloy ng PBA D-League Foundation Cup.

Makikilatis ang larong ipakikita ni Allan Mangahas sa pagharap ng Blackwater Elite sa Café France ngayong ika-12 ng tanghali sa Ynares Sports Arena sa Pasig City.

Si Mangahas ang tatayong pointguard ni coach Leo Isaac kapalit ni Jeric Fortuna na naglalaro na sa ASEAN Basketball League.

Ang mananalo sa larong ito ay sasalo sa Big Chill, Cebuana Lhuillier at Fruitas na may 1-0 karta.

Bubuksan din ng Hogs Breath ang kampanya laban sa Jumbo Plastic dakong alas-2 ng hapon bago sumalang ang nagpalakas ding Informatics kontra sa Boracay Rum dakong alas-4 ng hapon.

Kailangang kakitaan agad ng husay ang Hogs Breath at Icons  dahil pilit na babangon ang Jumbo Plastic at Boracay Rum mula sa pagkatalo noong Martes.

Tinambakan ang Jumbo Plastic ng Fruitas, 56-81, habang nakaungos sa Waves ang Cebuana Lhuillier, 66-68.