Clippers nagposte ng bagong franchise record
LOS ANGELES -- Matapos iposte ng Los Angeles Clippers ang record para sa pinakamahabang winning streak sa kanilang franchise history, inisip naman ni Chris Paul sina Ron Harper, Corey Maggette at iba pang mga dating players na nakaranas ng mga kabiguan.
Humakot si Paul ng 24 points at 13 assists para tulungan ang Clippers na basagin ang kanilang 38-year-old club mark para sa kanilang pang-12 sunod na panalo mula sa 97-85 paggupo sa Sacramento Kings.
Ang dating marka ay inilista ng Buffalo Braves sa 1974-75 season nang 8-anyos pa lamang si Clippers coach Vinny Del Negro.
Kumolekta naman si Blake Griffin ng 21 points at 13 rebounds para sa Clippers.
Tinalo ng Los Angeles ang Sacramento sa pang limang sunod na pagkakataon, kasama ang tatlo sa nakaraang season.
Hindi pa natatalo ang Clippers sapul noong Nobyembre 26 sa Staples Center.
- Latest
