Taob ng yaya Kris kulelat sa forever!

Panahon ngayon ng mga yaya dahil araw-araw na headline ng mga diyaryo si Yaya Dub ng Eat Bulaga at hindi nagpatalbog ang Yaya Gerbel ni Bimby Yap dahil may mga news tungkol sa pagpapakasal nila ng kanyang boyfriend.

Parehong walang kinalaman sa showbiz si Yaya Gerbel at ang dyowa nito pero pinag-usapan ang kanilang wedding day dahil sa pag-iyak ni Bimby.

Touching naman talaga ang eksena na iyak nang iyak ang bagets habang yakap-yakap ang yaya niya.

Isa lang ang nasa isip ko nang ma-sight ko ang pag-cry me a river ni Bimby, mabuti pa ang yaya niya, may lovelife pero ang kanyang madir, wiz!

Kinaiinggitan si Kris Aquino dahil sa kanyang fame and fortune. Hindi dapat kainggitan si Kris dahil malungkot ang kanyang lovelife bilang hindi pa niya natatagpuan ang mhin na mamahalin forever and ever.

Lea hindi totoong nag-break sa social media?!

Pabor kay Lea Salonga ang ginawa nito na pagsagot sa tweet ni Joey de Leon tungkol sa kababawan issue dahil natapos na ito.

Huminto na ang mga bashing kay Lea sa social media na naiwasan sana na mangyari kung hindi siya nag-tweet. At least, si Lea ang nagsimula ng isyu at siya rin ang tumapos.

Puwede nang i-lift ni Lea ang kanyang self-imposed semi-break sa Twitter. Teka, nag-break nga ba siya? Hindi naman malalaman ng mga tao kung patuloy ang pagbabasa niya ng mga tweet sa kanya, positive man o negative.

Baka katulad siya ng isang sikat aktres na binansagan na patola na nag-goodbye sa Twitter dahil napapaaway siya pero active pa rin ang kanyang account. Lurking lamang siya sa social media.

Felix Manalo huhusgahan na kung pasok sa Guinness World Records!

Excited na ang mga miyembro ng Iglesia Ni Cristo dahil bukas na ang pinakamalaki at engrande na premiere ng Felix Manalo sa Philippine Arena.

Pigil na pigil na ang kanilang mga hininga dahil bukas din malalaman kung tagumpay ang Viva Films sa attempt nito na makuha ang Guinness World Records para sa premiere ng isang pelikula na dinaluhan ng pinakamaraming tao.

Kung excited ang mga miyembro ng Iglesia Ni Cristo, triple ang excitement ng production crew ng Viva Films dahil ang pelikula na pinaghirapan nila ang huhusgahan ng mga official representative ng Guinness Records.

Kung anuman ang magiging resulta ng pagtatangka ng Viva Films sa Guinness Records, happy na rin ang production staff ng Felix Manalo dahil Graded A ito ng Cinema Evaluation Board (CECB) na isa lang ang ibig sabihin, maganda ang kanilang pelikula na nararapat na tangkilikin ng madlang-bayan.

Arnold at Boy halos pareho ang title ng talk show

Dalawa na pala ang mga talk show na halos pareho ang title, ang Tonight With Arnold Clavio ng GMA News TV at ang Tonight With Boy Abunda ng ABS-CBN.

Parehong entertaining ang mga evening program nina Arnold at Boy na kapwa malapit sa akin kaya hinihikayat ko ang lahat na tangkilikin ang kanilang mga talk show na hindi naman magkaribal sa timeslot.