Quiambao, Pastrana hinirang na Basketball Player of the Year sa CPC Awards Night
MANILA, Philippines — Naukit ang kasaysayan nang bigyang parangal ang mga pambato ng women’s basketball at men’s volleyball sa unang pagkakataon sa ginanap na 2024 Collegiate Press Corps Awards Night kamakalawa sa Discovery Suites sa Pasig.
Tinanghal na kauna-unahang Collegiate Women’s Basketball Player of the Year si Kent Pastrana ng University of Santo Tomas matapos trangkuhan ang Tigresses sa UAAP Season 86 championship para mawakasan ang 7-time champion na National U.
Nakasama niya bilang major awardee bilang Collegiate Men’s Basketball Player of the Year si Kevin Quiambao ng UAAP men’s champion upang banderahan ang kabuuang 23 awardees sa gabi ng parangal na suportado ng San Miguel Corporation at Philippine Sports Commission.
Dahil dito, bida rin si Pastrana sa inaugural na Women’s Mythical Five tampok ang kakampi at UAAP Finals MVP na si Tantoy Ferrer, Josee Kaputu ng FEU, Favour Onoh ng UP at UAAP Season MVP na si Kacey dela Rosa ng Ateneo.
Sa tradisyunal na Men’s Mythical Five ay bandera si Quiambao kasama sina NCAA Rookie-MVP Clint Escamis ng Mapua, Malick Diouf ng UP, Enoch Valdez ng Lyceum at dating San Beda na si Jacob Cortez.
Kinilala rin sa unang beses ang mga standouts ng men’s volleyball na sina UAAP Men’s Volleyball Player of the Year Owa Retamar ng NU at Louie Ramirez ng Perpetual bilang NCAA Men’s Volleyball Player of the Year.
Maging ang mga coaches sa women’s basketball at men’s volleyball ay nabigyan ng pagkilala sa unang pagkakataon.
Ito ay sina Haydee Ong ng UST bilang Women’s Basketball Coach of the Year, Dante Alinsunurin (UAAP Men’s Volleyball Coach of the Year) at Norman Miguel (UAAP Women’s Coach of the Year) ng NU, Sammy Acaylar (NCAA Men’s Volleyball Coach of the Year) at Jerry Yee (NCAA Women’s Volleyball Coach of the Year) ng College of St. Benilde.
Sa ikalawang sunod na taon, binigyang-pugay din ng CPC ang mga pambato ng women’s volleyball na sina Bella Belen (UAAP Women’s Volleyball Player of the Year) ng NU at Cloanne Mondonedo (NCAA Women’s Volleyball Player of the Year) ng CSB.
- Latest
