Paalam nag-goodbye sa Asiad gold

MANILA, Philippines —  Humulagpos kay Pinoy pride Carlo Paalam ang inaasam na gold medal matapos ang masaklap na 2-3 split decision loss kay hometown bet Rui Yamaguchi sa finals ng men’s 55-kilogram division sa 20th Asian Games boxing competition kahapon sa Nishio Gymnasium sa Aichi, Japan.

Nakuntento ang amateur fighter ng Cagayan de Oro sa silver medal.

Bigo rin ang 28-anyos na si Paalam na tapusin ang pagkauhaw ng Pilipinas sa Asiad boxing gold na huling naibigay ni Rey Saludar sa 2010 edition sa Guangzhou, China.

Inireklamo ni Paalam, ang nag-iisang atleta ng Association of Boxing Alliances in the Philippines (ABAP) na nakasuntok ng medalya sa Aichi-Nagoya Asiad, ang pamamahala sa laban ni Uzbek referee Maruf Urdushev.

“Kahit anong momentum, ini-stop pa rin po, tapos iba talaga ‘yung referee rin. Iyong referee talaga parang ako palagi nakikita,” sabi ng 28-anyos na 2024 Tokyo Olympic Games silver medalist.

Kaagad kinuha ni Yamaguchi ang 4-1 abante sa scorecards sa first round bago ibinuhos ni Paalam, ang 2018 Asiad bronze medalist sa Jakarta, Indonesia, ang kanyang lakas sa second at third round.

Ngunit bigo pa rin ang Pinoy fighter sa Ja­panese boxer sa desisyon ng mga judges.

“I think it was a bad decision. And then at the same time, frustrating na ‘yung same referee — the same referee na nag-referee sa kanya sa semifinals, obviously biased against him during the semifinals — ‘yun na naman ang in-appoint sa atin in the finals,” ani ABAP president Marcus Manalo.

Hindi umabot sa medal round sina Tokyo Olympic silver medalist Nesthy Petecio at Paris Olympics bronze medal winner Aira Villegas.