Morales, bumida sa PFA National tilt

MANILA, Philippines — Patuloy ang pagpapakitang-gilas ng 13-anyos na si Christine May Morales bilang isa sa mga pinakamalaking batang pag-asa ng Philippine fencing.

Tumusok si Morales ng gold medal sa Cadet Women’s Foil event ng 3rd Leg Cadet and Junior Championships kamakailan sa Rizal Memorial Coliseum sa Malate, Manila.

Sinapawan ng Grade 8 student-athlete at scholar ang kanyang mas matandang teammate sa University of the East na si 17-anyos Willa Liana Galvez, 15-4, upang mapanatili ang kanyang puwesto bilang top cadet fencer sa Under-14 division.

Papasok sa finals ay tinalo ni Morales ang kapwa national team member at UE teammate na si Yuna Samuelle Canlas.

Wagi si Morales sa dikit na laban, 15-13, upang makapasok sa championship round.

Matapos ang first-round bye, tinalo muna ni Morales si Yuki Togawa ng HCFC, 15-7, bago niya nilampasan si Regina Zenais Pascual ng Team RF, 15-10, sa preliminary rounds.

Ang nasabing panalo ay dagdag sa kahanga-hangang international campaign ni Morales.

Noong nakaraang buwan ay dinaig ni Morales si Canlas sa isang all-Filipino final ng Cadet Women’s Foil sa Southeast Asian Fencing Federation (SEAFF) Junior and Cadet Championships sa Kuala Lumpur, Malaysia.

Third place ang Philippine delegation sa SEAFF championships matapos kumolekta ng limang gold, pitong silver at 13 bronze medals para sa kabuuang 25 medalya.

“I’m very happy and excited that our team swept the podium. It was a very tough match against Yuna (Canlas) and Willa (Galvez),” ani Morales.

“Una po, nagpapasalamat ako sa Diyos dahil binigyan niya ako ng lakas at sa suporta ng aking pamilya. Malaking tulong po ang kanilang pag-cheer para magkaroon ako ng momentum na kailangan ko,” dagdag niya.

Gayunman, hindi pa kuntento si Morales sa kanyang mga nakamit.

Sinabi ng 5-foot-6 na batang fencer na handa siyang magsakripisyo at magsanay nang higit pa upang mapahusay ang kanyang kakayahan at matupad ang pangarap na katawanin ang Pilipinas sa mga pangunahing international competitions.

Ang 3rd Leg Cadet and Junior Championships ay co-presented ng Philippine Fencing Association at Philippine Sports Commission.

Para sa kumpletong resulta, maaaring bisitahin ang official Facebook page ng Philippine Fencing Association.