Pillar, Jugadora puwede sa Olympics

MANILA, Philippines — Kumpiyansa si Philippine Sports Commission (PSC) chairman Patrick ‘Pato’ Gregorio na may mga susunod pa kay national rower Joanie Delgaco na makakalaro sa Olympic Games.

Ilan sa kanyang mga nabanggit ay sina Emman Pillar at Matt Jugadora na sumagwan ng gold at silver medal sa katatapos lamang na Asian Rowing Beach Sprint Championships sa Jomtien Beach sa Pattaya, Thailand.

“We are looking at future Olympians in Pillar and Jugadora,” wika ni Gregorio, dating pangulo ng Philippine Rowing Association, sa itinuring niyang “treasures” mula sa Ternate, Cavite na maaaring makalaro sa Olympics.

Sa pamumuno ni Gregorio sa rowing association ay naging atleta niya sina Pillar at Jugadora.

“They are the treasures of the Philippine seas,” wika ni Gregorio. “They are sons of fishermen. They are our grassroots rowers from Ternate, Cavite.”

Si Delgaco ang kauna-unahang female rower ng Pilipinas na nag-qualify sa Olympics sa Paris noong 2024.

Nauna nang sumagwan sa quadrennial event sina Edgardo Maerina (Seoul, 1988), Benjie Tolentino (Sydney, 2000) at Cris Nievarez (Tokyo 2020).

Wagi si Pillar sa Under-16 Coastal Men’s Solo, habang sumegunda si Jugadora sa Under-19 Coastal Men’s Solo sa beach sprint championships sa Thailand.

Panalo rin ng gold medal sina Ayonna Huerto at Khayzie Caviltes sa Under-19 Coastal Women’s Double Sculls at Pillar at Kyle Olano sa Under-16 Coastal Men’s Double Sculls.