Kazakh nagpalakas sa semis

CANDON CITY, Ilocos Sur — Lumakas ang tsansa ng Kazakhstan na sumampa sa susunod na phase matapos kalusin ang Iran, 13-25, 25-20, 25-14, 25-19 sa Day 3 ng Asian Volleyball Confederation (AVC) Women’s Volleyball Cup na nilaro sa Candon Arena kahapon dito.

Malinis sa tatlong panalo ang Kazakhstan sa Pool B, una  nilang pinayuko sa opening day ang Hong Kong, 20-25, 25-17, 25-16, 25-13, sunod ang Indonesia, 25-19, 25-19, 25-19.

Tumikada si Kristina Belova ng 23 points mula sa 21 attacks at dalawang blocks, may kinana naman si Tatyana Yatskiv ng 13 markers kasama ang 10 kills at tatlong blocks.

Walang mantsa sa dalawang salang ang Vietnam, hindi pa rin natatalo kahit isang set nakatakda naman nilang harapin ang Indonesia.

Ang top two sa bawat pool ay uusad sa semifinals sa tournament na suportado ng Philippine Sports Commission, FIVB, Volleyball World, AVC, POC at Candon City sa pamumuno ni Mayor Eric D. Singson.

Para sa world ranking points mahalaga sa 12-nation meet na hindi sasampa sa semifinals na lumaro sa classification round.

Nirehistro naman ng Hong Kong ang unang panalo matapos pagpagin ang Lebanon, 25-20, 25-8, 25-13.

Si Sum Yuen Tang ang namuno sa opensa para sa Hong Kong sa tinikadang 14 points mula sa 12 attacks at dalawang service aces.