Bolts sumilip sa Top Four

MANILA, Philippines — Pinormalisa ng Meralco ang pagsampa sa eight-team quarterfinal round matapos basagin ang sibak nang Blackwater, 108-93, sa Season 50 PBA Commissioner’s Cup kahapon sa Smart Araneta Coliseum.

Humakot si import Marvin Jones ng 26 points at 12 rebounds habang nagdagdag si Chris Banchero ng 14 markers kasunod ang tig-12 points nina CJ Cansino at Bong Quinto.

Ang ikalawang sunod na ratsada ng Bolts ang nagtaas sa kanilang kartada sa 7-3 at pinalakas ang tsansa sa isa sa apat na ‘twice-to-beat’ incentives sa quarterfinals.

“We know how important it is to get the Top Four. We’ve been on the outside for the last few conferen­ces,” sabi ni Banchero. “To get into the Top Four is a huge boost for our team.”

Nagmula ang tropa ni coach Luigi Trillo sa 112-91 paglasing sa Barangay Ginebra noong Biyernes.

Laglag naman ang Bossing sa ikatlong dikit na kamalasan para sa 2-9 baraha.

Ang drive ni CJ Cansino ang nagbigay sa Meralco ng 31-18 bentahe sa first period na kanilang pinalobo sa 54-38 sa 6:01 minuto ng second quarter mula sa four-point shot ni Banchero.

Sa likod ni seven-foot import Robert Upshaw ay naputol ito ng Blackwater sa 54-61 sa pagbubukas ng third period.

Ngunit isang 22-8 atake ang inilunsad ng Bolts para itarak ang 21-point lead, 83-62, sa huling 3:54 ng nasabing yugto.

Lalo pang nabaon ang Bossing sa 98-72 matapos ang three-point shot ni Aaron Black sa 8:21 minuto ng final canto.

Ang dalawang free throws ni Kyle Pascual sa huling 2:27 minuto ang nagtaas sa Meralco sa 107-84 sa huling 2:27 minuto.

Tumapos si Upshaw na may 31 points at 12 rebounds para sa Blackwater.

Nag-ambag si Fil-Am point guard Sedrick Barefield ng 16 markers, 5 assists at 3 boards.

May 11 points si Paul Zamar para sa koponan ni coach Pat Aquino.

Huling lalabanan ng Bossing ang talsik na ring Converge FiberXers sa Mayo 9 sa Ynares Center sa Antipolo City.