Tropang 5G nahirapan sa Macau Black Knights

MANILA, Philippines — Dumaan muna sa butas ng karayom ang TNT Tro­pang 5G bago mataka­san ang guest team Macau, 119-112, sa Season 50 PBA Commissioner’s Cup kahapon sa Smart Ara­neta Coliseum.

Anim na mahalagang free throws ang ipinasok ni Jordan Heading sa dulo ng fourth quarter para sa bounce back win ng Tropang 5G at pagandahin ang kartada sa 6-3.

Nadiskaril naman ang asam na back-to-back wins ng Black Knights para sa ka­­nilang 1-8 baraha.

Humakot si 7-foot-3 im­port Bol Bol ng 37 points, 14 rebounds at 6 blocks para banderahan ang TNT, habang may 20 markers si Heading.

Nagdagdag si Brandon Ganuelas-Rosser ng 17 points at may 16 markers, 10 boards at 4 assists si Cal­vin Oftana para sa tropa ni coach Chot Reyes.

“We just kept remin­ding the guys during the hud­dles, during timeouts, even when they were ma­king runs to just grind it out, grind it out and I think in the end that’s what happened,” sabi ni Reyes.

Nakadikit ang Macau sa 112-113 sa huling 26 se­gundo sa fourth quarter ma­tapos ang drive ni point guard Damian Chongqui.

Ang dalawang free throws ni Heading ang nag­layo sa Tropang 5G sa 115-112 sa nalalabing 23 segundo kasunod ang min­tis na four-point attempt ni Chongqui sa posesyon ng Black Knights.

Muling nagsalpak ng da­lawang foul shots si Hea­ding na nagbigay sa TNT ng 117-112 bentahe sa hu­ling 14 segundo.

Ang dalawang charities ni Heading sa natitirang li­mang segundo ang sumel­yo sa kanilang panalo.

Samantala, hinugot ng Converge si dating Phoenix import Donovan Smith para palitan si Kylor Kelley at buhayin ang kanilang tsansa sa quarterfinals.

Sa 97-92 panalo ng Fi­berXers (3-6) sa Tropang 5G noong Miyerkules ay umiskor lamang si Kelley ng apat na puntos bukod sa siyam na rebounds.