Burton ipaparada ng NLEX kontra Macau

MANILA, Philippines — Isasalang ng NLEX si bagong import Deonte Bur­ton sa kanilang pagsagupa sa guest team Macau sa pagbabalik ngayon ng Season 50 PBA Governors’ Cup sa Ninoy Aquino Sta­dium sa Malate, Manila.

Magtutuos ang Road Warriors at Giant Pandas sa alas-5:15 ng hapon ka­sunod ang bakbakan ng nagdedepensang TNT Tro­pang 5G at Terrafirma Dyip sa alas-7:30 ng gabi.

Tabla sa itaas ng Group A ang NLEX at San Miguel sa pareho nilang 7-2 baraha kasunod ang Converge (5-4), TNT (4-4), Terrafirma (3-5), Macau (2-6) at Titan Ultra (2-7).

Bumabandera sa Group B ang Rain or Shine na may 4-2 marka sa itaas ng Magnolia (4-3), Phoenix (4-3), Blackwater (3-3), Me­ralco (3-5) at Barangay Ginebra (2-4).

Ang 6-foot-4 na si Burton ang sasalo sa naiwang trabaho ni DeQuan Jones na nagkaroon ng leg injury no­ong Agosto bago ang ma­­habang PBA break para sa kampanya ng Gilas Pi­­lipinas sa fourth window ng 2027 FIBA World Cup Qualifiers at sa 20th Asian Games sa Aichi-Nagoya, Ja­pan.

“As great of a basketball player as DB is, I think he’s just as good of a person,” ani Road Warriors coach Jimmy Alapag kay Burton. “I think he’ll give us a great chance in the second half of the conference.”

Nakasama ni Alapag si Burton sa Sacramento Kings sa NBA at sa Stockton Kings sa G-League kung saan tumayong  as­sis­­tant coach ang Gilas Pil­ipinas at PBA le­gend.

Magpaparada rin ng bagong reinforcement ang Giant Pandas sa katauhan ni Oscar Lopez bilang ka­palit ni  De’Vondre Perry.

Ang 6’4 ding si Lopez ay naglaro bilang natura­lized player ng Cambodia laban sa Gilas Pilipinas sa 2023 Southeast Asian Games sa Thailand.

Samantala, ibibida ng Tropang 5G si Nick Horns­by kapalit ni Rahlir Hollis-Jefferson sa pagharap nila sa Dyip.

Si Hornsby ay sumalang para sa Hangtuah Ja­­­karta team sa Indonesian Bas­­ket­ball League.