Eala sinibak si Linette, pasok sa Miami Open round of 16
MANILA, Philippines — Tuloy ang magical run ni Alex Eala matapos patumbahin si Magda Linette ng Poland sa iskor na 6-3, 7-6 (2) upang umusad sa fourth round ng Miami Open na ginaganap sa Hard Rock Stadium Grandstand Court sa Florida.
Kinailangan ng 20-an-yos na si Eala na magbanat ng buto sa second set upang pigilan ang tangka ni Linette na maipuwersa ang deciding third set.
Sa katunayan, nakabaon ito sa 5-6 iskor bago maitabla ang laro sa 6-all. Sa tiebreak, rumatsada agad sa 3-0 kalamangan si Eala bago tuluyan pabagsakin si Linette.
Tumagal lamang ang laro ng isang oras at 48 minuto — malayo sa tatlong oras at 20 minuto na laban nito sa second round laban kay Laura Siegemund ng Germany.
“I think patience was a very key aspect of how I played today,” ani Eala.
Aminado si Eala na hindi madaling kalaban si Linette lalo pa’t apat na beses na itong nagharap sa WTA Tour.
“You said it first, Magda is such a fighter and every time I played against her, she’s put me in such difficult positions. So, kudos to her for playing well and I really enjoyed the battle,” dagdag ni Eala.
Sunod na makakasagupa ni Eala si 13th seed Karolina Muchova ng Czech Republic na nanaig kay Katie Boulter ng Great Britain, 6-3, 7-5, sa hiwalay na laban.
Dahil sa pagpasok sa fourth round, umangat si Eala sa WTA live rankings.
Kasalukuyan na itong nasa No. 44 sa live rankings mula sa kanyang dating puwesto na No. 50.
Posible pa itong umangat sa oras na muling makapagtala si Eala ng panalo.
Kailangan ni Eala ng panalo upang mapanatiling nasa magandang puwesto ito sa WTA rankings para sa mga susunod na torneong lalahukan nito partikular na ang nalalapit na French Open at Wimbledon Championships.
- Latest
