Cignal pinutol ng Akari

MANILA, Philippines —  Mula sa 0-3 panimula ay dalawang sunod na panalo ang itinala ng Akari sa 2026 Premier Volleyball League All-Filipino Confe­rence.

Tinakasan ng Chargers ang Cignal Super Spikers, 25-23, 20-25, 11-25, 25-23, 15-12, para buhayin ang tsansa sa qualifying round kahapon sa FilOil Centre sa San Juan City.

Pumalo si middle b­locker Ivy Lacsina ng 20 points mula sa 16 attacks, tatlong blocks at isang service ace para sa 2-3 baraha ng Akari na galing sa four-set win sa Nxled (3-2).

Nagdagdag si middle blocker Fifi Sharma ng 16 markers sa likod ng 11 attacks at limang blocks kasunod ang tig-14 points nina Eli Soyud at Ced Domingo habang may 18 excellent sets si setter Mars Alba.

Nadiskaril ang hangad na back-to-back wins ng Cignal para sa kanilang 4-2 baraha.

“Today napatunayan namin na we can bounce back even though we came from a very bad set,” ani Sharma sa 11-25 talo ng Chargers sa third set na nagbigay sa Super Spikers ng 2-1 abante sa laro.

Sa likod nina Sharma, Ivy Lacsina at Eli Soyud ay nakatabla ang Akari sa fourth frame, 25-23, para makapuwersa ng fifth set sa Cignal.

Kinuha ng Chargers ang 9-5 bentahe sa fifth set bago nakadikit ang Super Spikers sa 10-11 sa pa­ngunguna nina Erika Santos at Vangie Gandler na tumapos na may tig-23 points.

Muling nakalayo ang Akari sa 14-11, habang inilapit ni Santos ang Cignal sa 12-14.

Ang hataw ni Grethcel Soltones ang sumelyo sa panalo ng Chargers na target ang ikatlong sunod na panalo sa pagsagupa sa Capital1 Solar Spikers (3-3) sa Marso 7.