Fifth batch para sa Philippine Sports Hall of Fame
MANILA, Philippine — Pamumunuan ng Philippine Sports Commission (PSC) sa ilalim ni chairman Patrick Gregorio ang paghahanap sa pinakabagong grupo para sa listahan ng mga legendary at exceptional Filipino sports heroes.
Binuo ang Philippine Sports Hall of Fame noong 1999 sa pamamagitan ng Republic Act No. 8757 at nilagdaan ni dating Pangulong Joseph Estrada.
Iniluklok ang first batch ng mga honorees noong 2010 tampok ang 10 athletes kasunod ang 17 noong 2016 at 10 noong 2018 at 10 noong 2021 para sa kabuuang 47 inductees.
Kabilang sa mga nasa honor roll ay sina Simeon Toribio, Miguel White, Caloy Loyzaga, Ceferino Garcia, Pancho Villa, Gabriel Elorde at Teofilo Yldefonso nong 2010.
Ang grupo nina Mona Sulaiman, Ed Ocampo, Kurt Bachmann, Eugene Torre, Felicisimo Ampon at Johnny Jose ay iniluklok noong 2016 kasunod sina Lydia de Vega-Mercado, Filomeno Codinera, Ambrosio Padilla, Olivia Coo, Paeng Nepomuceno at Ben Arda noong 2018.
Sina Elma Muros-Posadas, Robert Jaworski, Arianne Cerdena, Leopoldo Serantes, Roel Velasco, Paulino Alcantara at Eric Buhain ang ikaapat na grupo ng mga inductees noong 2021.
Inihayag din ng PSC na simula na ang mga nominasyon para sa susunod na grupo ng mga inductees.
Iniimbitahan ang mga individuals at organizations na magbigay ng nominasyon para sa mga karapat-dapat na sports icons bago ang March 15 deadline.
Ang mga nominations ay tatanggapin sa pamamagitan ng PSC Facebook page.
Hangad ng Philippine Sports Hall of Fame “to immortalize the Filipino sports heritage and serve as an inspiration for our countrymen.”
Sa ilalim ng batas, ang mga maaaring iluklok ay ang mga Filipino athletes, coaches at trainers na nanalo ng gold medal sa anumang Southeast Asian Games o silver medalist sa Asian Games o Asian Games o bronze medalist sa anumang Olympic o World Games o isang world champion sa anumang professional o amateur sports competition.
Ang binuong seven-man selection committee ay binubuo nina Gregorio, Philippine Olympic Committee president Abraham Tolentino, MVP Sports Foundation president Al Panlilio, Games and Amusement Board chairman Atty. Francisco Rivera, Tony Lambino ng Ayala Foundation Inc., Vovinam Federation of the Philippines Secretary-General Jose “Jop” Malonzo at Pilipinas Curling secretary-general Jarryd Bello.
Ang review committee ay kinabibilangan nina seasoned sports journalists Quinito Henson ng The STAR, Al Mendoza ng Business Mirror, Dodo Catacutan ng Spin.ph, Jun Lomibao ng Business Mirror at Ignacio Dee ng Manila Standard.
- Latest
