Biado No. 1 sa world money maker list
MANILA, Philippines — Okupado ni reigning World 9-Ball champion Carlo Biado ang No. 1 spot sa Az Billiards world money maker list matapos ang matikas na kampanya sa season na ito.
Namamayagpag si Biado matapos makalikom ng kabuuang $283,750 premyo sa taong ito o halos P16 milyon.
Pinakamalaking premyo na nakuha ni Biado ang $250,000 nang magkampeon ito sa 2025 WPA World 9-Ball Championship noong Hulyo.
Tinalo ni Biado sa finals si Fedor Gorst ng Amerika sa pamamagitan ng gitgitang 15-13 desisyon.
“I’m over the moon—I still can’t believe I’m a two-time World Champion. It means everything to me. I’m so proud to bring this trophy home to the Philippines,” ani Biado.
Kasama rin ang $17,500 na nakuha nito sa kanyang third-place finish sa World 10-Ball Championship na ginanap kamakailan sa Ho Chi Minh City, Vietnam.
Ang ibang premyo ay galing sa mga minor events na nilahukan nito.
Tanging si Johann Chua lamang ang nakasama ni Biado sa Top 10 list ng money maker.
Nasa No. 10 si Chua hawak ang $76,000 premyo.
Pinakamalaking nakuha ni Chua ang $25,000 kung saan nagtapos ito sa ikatlong puwesto sa US Open 9-Ball.
May $20,000 din si Chua nang magkampeon ito sa Battle of the Bull sa Virginia sa Amerika at $12,000 nang maghari ito sa Knight Shot 9-Ball Open sa Dubai, United Arab Emirates.
Hawak ni Gorst ang ikalawang puwesto sa ranking tangan ang $249,700 kasunod sa No. 3 si Aloysius Yapp ng Singapore ($277,450), No. 4 Joshua Filler ng Germany ($197,928) at No. 5 Shane Van Boening ng Amerika ($149,900).
- Latest
