Ancajas kakasa kay Casero sa Aug. 2

MANILA, Philippines —  Matapos sina Mark Magsayo at Eumir Felix Marcial ay si dating world super flyweight champion Jerwin Ancajas ang isasalang naman ng MP Promotions ni Manny Pacquiao.

Lalabanan ni Ancajas si Ruben Casero ng Uruguay sa isang eight-round, non-title fight sa Agosto 2 sa Thunder Studios sa Long Beach, California.

Hindi naisama si Ancajas sa undercard ng suntukan nina Pacquiao at Mario Barrios noong Linggo sa MGM Grand sa Las Vegas, Nevada.

Sa nasabing undercard ay tinalo ni Magsayo (28-2-0, 18 KOs) si Mexican Jorge Mata (21-3-2, 13 KOs) via unanimous decision sa kanilang 10-round non-title super featherweight duel.

Pinatumba ni Marcial (6-0-0, 4 KOs) si American Bernard Joseph (11-3-1, 5 KOs) sa third round sa kanilang eight-round middleweight bout.

Si Ancajas ay nakasama nina Pacquiao, Magsayo at Marcial sa training sa Los Angeles, California.

Inaasahang gagamitin ni Ancajas, ang dating International Boxing Federation (IBF) super flyweight titlist, ang kanyang malawak na eksperyensya laban kay Casero.

Dalawang sunod na panalo ang sinuntok ng 33-anyos na si Ancajas (36-4-2, 24 KOs) kina Thai fighter Sukpraserd Ponpitak at kababayang si Richie Mepranum matapos matalo kay WBA bantamweight king Takuma Inoue noong Pebrero 24, 2024.

“This is another steppingstone for him to fight for a world title,” ani MP Promotions president Sean Gibbons sa pagsagupa ni Ancajas kay Casero (13-4-0, 5 KOs).