Houston Rockets mikompirma sa pag-abot ni Durant

CEBU, Philippines — Si All-Star forward Kevin Durant mobalhin gikan sa Phoenix Suns ngadto sa Houston Rockets isip kabahin sa usa ka rekord nga NBA trade nga naglangkob og pito ka teams. Mismo ang Rockets maoy mikompirma niini pinaagi sa usa ka opisyal nga pamahayag nga gipatik sa opisyal nilang website kagahapong adlawa.

Gawas sa pag-abot ni Durant, gidawat sab og balik sa Rockets ang kanhi big man nilang si Clint Capela nga ilang nabira pinaagi sa usa ka sign-and-trade deal uban sa Atlanta Hawks. Nalambigit sab sa makapakurat nga pagbinayloay og mga players ang Brooklyn Nets, Golden State Warriors, Minnesota Timberwolves ug Los Angeles Lakers.

Sa iyang post sa X, si Durant nanamilit na sa iyang mga fans sa Phoenix samtang mipadayag sa iyang kahiman nga mosul-ot sa uniporme sa Rockets nga maoy ikalima niyang NBA team.

Si Durant, nga 15 ka higayon nahimong NBA All-Star, maoy 2014 season MVP nga nakadaog og duha ka kampiyonato uban sa Golden State niadtong 2017 ug 2018.

Kaupat na scoring champion uban sa OKC, iyang gitimon ang Thunder ngadto sa 2012 NBA Finals apan gilupig sila sa Miami Heat nga gipangulohan ni LeBron James.

Sa ilang pagbuhi ni Durant, nakuha sa Suns ang 7'2" nga sentrong si Khaman Maluach gikan sa South Sudan, ang 10th overall pick sa NBA Draft niadtong Hunyo, ingon man sila si Houston forward Dillon Brooks ug guard Jalen Green, Atlanta wingman Daeqwon Plowden, Minnesota forward Rasheer Fleming ug Golden State guard Koby Brea.

Ang 36-anyos nga si Durant mitapon sa Phoenix niadtong Pebrero 2023 human siya gi-trade sa Brooklyn Nets.

Uban ni Durant, ang Suns nakadaog lamang og usa ka playoff series sud sa tulo ka seasons.

Samtang ang Rockets wala makasud sa playoffs sud sa upat ka sunod-sunod nga tuig sa wala pa sila mahagba sa mga kamot sa Warriors sa unang hugna ning tuiga.