Kasaysayan tuyo sa Converge
CEBU, Philippines — Ang Converge FiberXers naglaraw nga mokulit og kasaysayan sa dihang ilang sangkaon ang Rain or Shine Elasto Painters sa Game 4 sa PBA Season 50 Governors' Cup best-of-five quarterfinals karong adlawa (Biyernes, Nobyembre 6) didto sa Smart Araneta Coliseum sa siyudad sa Quezon.
Nahagba ang FiberXers sa Game 1, 120-124, apan ilang gibaslan ang E-Painters sa sunod nga duha ka duwa aron pagposte og 2-1 nga bentaha sa serye.
Tungod niini, ang FiberXers nanginahanglan og usa na lang ka daog aron moabante sa semifinals sa labing unang higayon sukad sa pagsud nila sa liga niadtong 2022.
Makab-ot sa Converge ang ilang tumong kon mapatikangkang nila pag-usab ang Rain or Shine sa alas 7:30 sa gabii nilang engkwentro.
Ang FiberXers pipila ka higayon nang nakasud sa quarterfinals, apan ang Final Four nagpabiling idlas sa ilang mga kamot.
Sa miaging season lamang, duna silay tulo ka higayon nga makatikang sa semis apan gitagak sila sa San Miguel Beer sa Governors' Cup, sa Rain or Shine sa Commissioner's Cup, ug sa Barangay Ginebra sa Philippine Cup.
Ning higayona, ang mga batos ni coach Delta Pineda malaumon nga mahatagan na og katumanan ang ilang gihandum.
Dili hinoon sila angayan nga mokompiyansa kay ang E-Painters adunay kapasidad nga mopatikalbong kanila.
- Latest
