Warriors naglaraw mopalig-on sa ilang kampanya sa final four

CEBU, Philippines —  Maningkamot ang University of San Carlos (USC) Warriors nga palig-onon ang ilang kampanya alang sa Final Four sa dihang ilang harongon ang University of San Jose-Recoletos (USJ-R) Jaguars sa Cebu Schools Athletic Foundation, Inc. (CESAFI) Season 26 basketball tournament karong adlawa (Domingo, Nobiyembre 8) sa Cebu Coliseum.

Magsugod ang duwa alas-5 sa hapon.

Ang USC naa karon sa ikatulong puwesto sa college division standings uban ang 7-4 win-loss rekord, usa ka duwa lang ang labaw sa 6-4 nga USJ-R.

Laraw usab sa Warriors nga makabalos sa Jaguars nga mipildi kanila, 58-56, sa unang hugna sa eliminasyon niadtong Oktubre 3.

Sa laing duwa sa kolehiyo, ang 2-8 nga University of the Philippines (UP) Cebu Fighting Maroons nagtinguha og usban og parot ang 1-9 nga University of Southern Philippines Foundation (USPF) Panthers sa dihang magbugno sila sa alas 3:30 sa hapon.

Gipukan sa Fighting Maroons ang Panthers, 72-57, sa miagi nilang engkwentro  niadtong Oktubre 2.

Sa high school division, ang University of Cebu (UC) Junior Webmasters mosuway pag-inat sa 7-3 nilang baraha sa dihang ilang banggaon ang 6-2 nga USJ-R Jaguar Cubs sa alas-2 sa hapon.

Ang 2-5 nga USPF Baby Panthers makigpinaksitay sa 1-7 nga PAREF Springdale School Titans sa alas 10:30 sa buntag, samtang mag-atbang ang 3-5 nga Cebu Eastern College (CEC) Dragons ug San Roque College de Cebu (SRCDC) Greyhounds sa alas 12:30 sa udto.