Bagong NBA record sa Celtics
BOSTON — Humataw si Jaylen Brown ng 31 points kasama ang tatlong three-pointers sa pagbasag ng nagdedepensang Celtics sa NBA record para sa 3-pointers sa isang season sa 123-103 pagpapalubog sa Phoenix Suns.
Kumonekta ang Boston (57-20) ng 14 triples para sa kanilang season total na 1,370 at ungusan ang NBA record na 1,363 tres na ipinasok ng Golden State Warriors noong 2022-23.
Bumangon ang defending champions mula sa pagkakapigil ng Miami Heat sa kanilang nine-game winning streak.
Nagdagdag si Jayson Tatum ng 23 points, 8 rebounds at 8 assists habang may 15 markers si Kristaps Porzingis.
Kumabig si Devin Booker ng 37 points sa pang-limang dikit na kamalasan ng Phoenix (35-42).
Sa Houston, umiskor si Fil-Am Jalen Green ng 34 points at may 31 markers si Alperen Sengun sa 125-111 paggupo ng Rockets (51-27) sa Oklahoma City Thunder (64-13) at tapusin ang 11-game winning streak nito.
Sa Toronto, kumamada si Tim Hardaway Jr. ng 23 points at humakot si Jalen Duren ng 21 points at 18 rebounds sa 117-105 paggiba ng Pistons (43-34) sa Toronto Raptors (28-50) at kunin ang una nilang playoff berth sapul noong 2018-19.
Sa Los Angeles, bumira si Luka Doncic ng 35 points sa 124-108 panalo ng Lakers (47-30) sa New Orleans Pelicans (21-56).
- Latest
