Fajardo miinat sa iyang rekord ngadto sa walo ka MVP awards
![Fajardo miinat sa iyang rekord ngadto sa walo ka MVP awards](https://media.philstar.com/photos/2024/08/20/fajardo_2024-08-20_00-31-30.jpg)
CEBU, Philippines — Nagpadayon ang pag-ihap sa MVP award ni June Mar Fajardo. Ang 6'10" nga sentro sa San Miguel miinat sa iyang rekord ngadto sa walo na ka tropeyo isip MVP atol sa PBA Season 48 Leo Awards niadtong Dominggo didto sa Smart Araneta Coliseum.
Mao kini ang ikaduhang sunod-sunod nga season nga ang garbo sa Pinamungajan, Cebu gibayaw nga MVP ug ikawalo sa kinatibuk-an sa miaging siyam ka tuig. Si Scottie Thompson sa Barangay Ginebra maoy bugtong nakaputol sa dominanteng pagratsada ni Fajardo human siya maoy miangkon sa labing taas nga pasidungog sa liga niadtong Season 26.
"Sana next year ulit," matud pa ni Fajardo. "Kung may darating na award, tatanggapin ko. Kasi hindi naman tayo habang buhay maglalaro. Hanggang kaya nating maglaro, i-collect natin ito, para pag natapos na yung career ko, may babalikan ako, may titingnan ako."
Gilupig ni Fajardo ang labing sikit niyang mga karibal nga sila si Christian Standhardinger sa Terrafirma ug teammate niyang si CJ Perez. Silang tulo awtomatik nga naapil sa First Mythical Team kauban silang Chris Newsome sa Meralco ug Arvin Tolentino sa NorthPort. Triple ang selebrasyon ni Fajardo kay naapil man sab siya sa All-Defensive Team kauban silang Newsome uf Cliff Hodge sa Meralco, Joshua Munzon sa Northport, ug Terrafirma rookie Kemark Carino.
Sa laing bahin, naglangkob sa Second Mythical Team mao ang Rookie of the Year nga si Stephen Holt sa Barangay Ginebra, Calvin Oftana sa TNT, Jason Perkins sa Phoenix, Cliff Hodge, sa Mercaldo, ug Juami Tiongson sa Terrafirma.
Si Jhonard Clarito sa Rain or Shine maoy Most Improved Player, samtang si Paul Zamar sa Northport ang nakadawat sa Samboy Lim Sportsmanship award.
- Latest