SLCC Alumni Basketball League: Batch 1997, 2017 ug 2005 abante sa semis
CEBU, Philippines — Ang Batch 1997, 2017, ug 2005 mitagak sa tagsa-tagsa nila ka mga karibal aron pag-angkon og luna sa semifinals sa 2024 St. Louis College-Cebu Alumni Basketball League didto sa SLCC gym sa dakbayan sa Mandaue.
Si Rey Judilla mikadlit og 21 puntos, walo ka rebounds ug duha ka assists sa dihang gipabakwit sa Batch 1997 Cardinals ang Batch 2000, 66-44, aron pagligid ngadto sa Final Four.
Sila si Marvin Montezon ug Khimler Flores mihimo sab og kasikas sa Batch 1997 human nagkumbinar og 19 puntos, 11 ka rebounds, ug pito ka assists. Mitali si Steve Conde og 21 puntos, unom ka rebounds, ug lima ka assists samtang si Hans Binagatan adunay 10 puntos, unom ka rebounds ug upat ka asists apan nakawang ang ilang paningkamot sa Batch 1997.
Sa laing bahin, sila si Friedrich Batayola, John Abano, ug Mark Sasing nagkumboya'g 36 puntos, 16 ka rebounds ug 11 ka assists sa dihang gitagak sa Batch 2017 ang Batch 1994, 68-44, aron pagtikang sa semis. Si Clijster John Pescalla maoy nangu sa Batch 1994 bitbit ang 19 puntos, upat ka rebounds, ug lima ka assists samtang si Andrew Perales mitali og 13 puntos, lima ka rebounds ug upat ka assists sa pilderong kawsa.
Wala sab magpabitin si Cesar Dequita nga mipupo og 22 puntos, duha ka rebounds ug tulo ka assists aron tabangan ang Batch 2005 pagpalagpot sa Batch 2008, 55-47, ug pagsilyo og puwesto sa semis.
Si Dequita naka-angkon og dakong suporta gikan nilang Procopio Camacho ug Jesse Moncada nga nakatigum og 20 puntos, 14 ka rebounds, ug pito ka assists. Sila si Andrei Sencio, Jett Resol, ug Elwin Perez nakakolekta og 26 puntos, 25 ka rebounds ug upat ka assists apan nangahoyhoy ang ilang abaga kay ang Batch 2008 nanamilit na.
Ang liga gipaluyohan nilang SLCC Alumni President Rey Ceniza ug Batch 1999 President Malcolm Sanchez. Ang mga duwa ubos sa superbisyon ni commissioner Paul Alelu Flores inabagan nilangf deputy commissioners Francis Dumadag, Rommel Perez, Manuel Cobcoban, Arthur James Testa, ug Dale Byran Balili. Si Anthony Bacolod ang hepe sa technical committee.
- Latest
