Sa una niyang away gawas sa nasud laing WBO regional title buot langkaton ni Asilo
CEBU, Philippines — Ang pambato sa PMI Bohol Stable nga si Gerwin "The Gladiator" Asilo mosuway paglangkat og laing rehiyonal nga korona sa labing una niyang away sa langyawng lapyahan.
Ang garbo sa Ubay gikatakda nga makigsinukliay og kumo sa Hapon nga si Tenshin Nasukawa sa kulbahinam nga sangka tali sa way pildeng mga boksidor karong Oktubre 14 didto sa Ariake Arena sa Tokyo.
Madaog sa 10 ka hugna nilang rambol mao ang bakanting WBO Asia Pacific bantamweight title.
Si Asilo, nga misakmit sa WBO Oriental bantamweight belt human gipatikangkang si Thai Surat Eaim Ong sud lamang sa duha ka hugna sa miagi niyang away niadtong Hulyo 27 didto sa Bohol Wisdom School gym sa dakbayan sa Tagbilaran, nagkupot og perpektong 9-0 rekord uban ang 4KOs.
Samtang si Nasukawa wala pa say pilde sa upat ka away uban ang 2KOs. Si Asilo maoy bugtong Pinoy nga boksidor nga mopakita'g aksiyon sa makasaysayanong pasundayag nga naglangkob og pito ka world championship bouts sud sa duha ka sagunson nga adlaw
- Latest
