Tuburan 360 kampiyon sa ANS 3x3 Basketball

CEBU, Philippines — Ang mga garbong basketbolista sa Tuburan mipakita og igong katakos taliwala sa lig-on nilang mga langyaw nga kontra.

Tungod niini, midimdim sila sa katam-is sa kalamposan. Miduwa nga napuno sa kadasig, ang Tuburan 360 mipiog sa mga Amerikano nilang karibal gikan sa Chicago, 13-10, aron langkaton ang korona sa men's open division sa Allied Network Solutions (ANS) 3x3 Basketball Tournament Season 2 niadtong Dominggo, Septiembre 8, didto sa Sisters of Mary School-Boystown sa Barangay Tungkop, Minglanilla.

Gibandera nilang Miguelito Jusay, Mike Parilla, John Loufred Diamante ug Christian Cuevas, ang Tuburan 360 ubos sa paggiya ni coach John Andrew Molon maoy bugtong team nga lonlon Pinoy ang lineup apan wala nila pakyasa ang ilang mga kababayan pinaagi sa dalaygon nilang pagpiog sa mga bisitang koponan gikan sa Chicago, New York, New Jersey, Texas, ug Missouri nga mas dagko ug mas tag-as kanila.

“Mga players na gyud ni sila namo sa Under 25. Ga-start mi sa Governors Cup niadtong 2018 hangtud nga na-develop namo sila. Karon, sila nay among paduwaon kon naay mga liga-liga in the other towns but first time ni nila niapil sa 3x3 and naka-champion pa gyud. Nindot kayo ang feeling,” matud pa ni Tuburan 360 team owner ug manager Christian Daniel Diamante, usa ka lisensiyadong civil engineer ug anak ni Tuburan Mayor Aljun Diamante.

Pagsugod pa lamang sa ilang kampanya, ang mga pambato sa Tuburan nagsubay na og mapit-os nga agianan sa wala pa makaipsot batok sa Missouri, 13-12. Nag-agi na sab sila og makuyaw nga dalan sa wala pa makalingkawas batok sa Chicago, 19-17, ug New York, 11-9, sa unang adlaw sa kompetisyon. Sa ikaduhang adlaw sa kumbeti, ang Tuburan nahagba sa mga kamot sa New Jersey, 5-8, apan impresibo silang mibangon pinaagi sa paglampaso sa Texas, 13-5, aron paglugwa nga No.1 seedn human sa group stage.

Sa final match, si Xanthanus Pierro mituboy sa Chicago ngadto sa sayong 5-1 nga bentaha, apan ang Tuburan, luyo sa mainit nga mga kamot ni Parilla, hinay-hinay nga migukod hangtud nga ilang natabla ang iskor, 7-7, sa nahibilin nga usa ka minuto ug 10 segundos sa duwa.

Wala magdugay nailog sa Tuburan ang labaw ug wala na sila molingi pa dayon na ngadto sa paglansang og tres puntos nga kadaogan.

"Nindot kaayo kay ang atong mga kontra mga foreigners unya kita ray locals sa men’s open. Tuo gyud nako maglisod mi kay siyempre mga foreign players sila, lahi ilang training outside. Lahi ilang playing style, lahi sad atong playing style dire sa Pilipinas,” dugang pa ni Diamante. “Sa pagdula unya nakadaog among team, nakita nato nga achievement siya. And nga kaya gyud pud diay nato nga mo-compete sa mga foreign teams.”

Sa laing bahin, ang Abellana National School-Team A mipalayas sa SOM nga girepresentahan sa Team XXIV sa ilang trono pinaagi sa sikit nga 12-10 desisyon aron sakmiton ang 18 Under title. Ubos sa paggiya ni coach Ritche Bulawan, ang ANS-A gilangkoban nilang Eyrald Sacabin, Khayden Kasayan, Johnwenmund Sonsona ug Jameson Cadavas.

Sa Under 16 age group, ang Professional Youth Fellowship Basketball Advocacy (PYFBA) Team A nga gipangulohan nilang Christian Migallos, Xerex Saberon, ug Jersey Nino Llacuna maoy naghari human gipayaka ang RJN sa Minglanilla, 18-12.

Ang RJN duna hinoon gihapoy angayan nga ikalipay human ilang gilampornas ang OCCCI I-Share sa Ormoc City, 16-4, aron angkonon ang kampiyonato sa Under 14 category ubos sa paningkamot nilang Carl Andrew Book, Klarence Obeso, John Cedric Sasil ug Bernard Anton Alsola.