Daog og usa lamang ka lugas Pistons, Nuggets ug Bulls nakaipsot sa ilang kontra

CEBU, Philippines — Ang Detroit Pistons, Denver Nuggets ug Chicago Bulls nakaipsot sa tagsa-tagsa nila ka mga kaatbang og usa lamang ka lugas sa tulo ka makutas ug kulbahinam nga mga duwa sa NBA kagahapong adlwa.

Si Cade Cunningham mirehistro og triple-double samtang si Tim Hardaway Jr. nagmangtas sa overtime sa dihang gipiog sa Pistons ang  Miami, Heat 125-124.

Si Cunningham mihipos og 20 puntos, 11 ka rebounds ug career-high nga 18 ka assists sa ikaunom niyang triple-double ning season.

Mikawat sab og atensiyon si Hardaway pinaagi sa paglansang og tulo ka sagunson nga tres sa overtime nga nakatabang sa Pistons pagpabugnaw sa Heat.

Wala sab magpabitin si Malik Beasley nga miposa og pito ka 3-pointers sa iyang 28 puntos aton tabangan ang Pistons nga makasugakod sa triple-double ni Jimmy Butler, nga mikolekta og 35 puntos, 19 ka rebounds ug 10 ka assists alang sa Heat.

Sa laing mga aksiyon, si Nikola Jokic mipupo sa ika-10 niyang triple-double ning season sa dihang gipukan sa Nuggets ang Sacramento Kings, 130-129, samtang ang Chicago Bulls mipatigbabaw sa Toronto Raptors sa susamang makapaisa'g balahibo nga iskor, 122-121.

Si Jokic mikolekta og 20 puntos, 14 ka rebounds ug 13 ka assists samtang si Jamal Murray miamot og 28 puntos alang sa Nuggets.

Didto sa Toronto, si Nikola Vucevic mihipos og 24 puntos alang sa Bulls, nga nakakuha sab og 11 puntos, siyam ka rebounds ug walo ka assists gikan ni Josh Giddey.