Team ARQ nangu sa mga kampiyon sa Daily Grind 3x3 Christmas League

CEBU, Philippines — Ang ARQ Builders maoy nangu sa mga kampiyon sa malampuson nga Daily Grind I.T 3x3 Season 4 Christmas League didto sa Ground Zero Sports and Fitness Hub sa Barangay Tipolo, dakbayan sa Mandaue ning bag-ohay pa lamang.

Gilupig sa ARQ ang Karnehan ni Sacred Heart School-Ateneo de Cebu (SHS-AdC) Magis Eagles U15 coach Toton Tundag, 18-15, sa finals aron langkaton ang korona sa Parents category. Si Talisay City Mayor Samsam Gullas ang bida sa ARQ  uban ang otso puntos, upat ka rebounds ug tulo ka assists hinungdan nga siya maoy gibayaw nga MVP.

Miamot si Jason Arquisola og sayes puntos, unom ka rebounds ug duha ka assists, samtang si Gembert Chua sa Shetzue's Razor midugang og tres puntos, pito ka rebounds ug duha ka assists.

Si  Tristan Rama ang laing miyembro sa Team ARQ ubos sa pagtimon ni University of San Carlos (USC) Warriors coach Paul Joven.

Sa laing bahin, sila si Kristoff Dwayne Areja, Neilson Jan Bartolini, Yeshua Inoc ug Duke Rovin Eballe ang misakmit sa titulo sa 10 Under, sila si Eddie Ngo, Zuriel Encarnacion, Sage Bestante ug Yohan Binagatan ang nanghawod sa U12 title ug sila si Andre Peñaranda, Sebastian Vicentillo, Xian Tagimacruz ug Cassius Raganas ang naghari sa U13 age group.

Sila si Anthon Berame, Ryle Bertulfo, Johnclyde Undag ug Miggy Palomo ang midominar sa U15 class, samtang sila si Jhon Enriquez, Angelo Catarina. Kent Sarsosa ug Jon Barredo ang nakampiyon sa U16 division ning tinuig nga liga nga gipasiugdahan ni Daily Grind coach Tommy Spencer Ugsimar.