Sa iyang pagbalik sa ring Suganob magsagubang og malisud nga misyon batok sa thai ko artist

TAGBILARAN CITY, Philippines — Ang Boholanong world title contender nga si Regie “Filipino Phenom” Suganob mopas-an og mabug-at nga tahas sa iyang pagbalik gikan sa walo ka bulan nga walay kumbati sa dihang makigsinukliay siya og kumo batok ni Thai knockout artist Nanthanon Thongchai sa main event sa "Kumong Bol-anon 19" nga gipasiugdahan sa PMI Bohol Boxing Promotions karong adlawa (Sabado, Disiembre 21) dinhi sa Patrick Barder Gym sa Holy Name University (HNU).

Walay titulo nga maangkon ning 10 ka hugna nga binukbukay apan krusyal kini alang sa 27-anyos nga si Suganob tungod kay obligado man siya nga modaog aron dili madiskaril ang iyang damgo nga mamahimong world champion.    

Sa kasamtangan, ang garbo sa lungsod sa Dauis maoy No.1 light flyweight contender sa World Boxing Organization nga naghimo kaniyang mandatory challenger ni WBO 108-pound champion Shokichi Iwata sa Japan.

Kay mao ni iyang gisaytan sunod tuig, ang kapildihan dili opsiyon alang ni Suganob.

Ug nasayud siya niini.

"Kani nga away importante kaayo para nako, " matud pa ni Suganob, nga wala na maka-away sukad siya nakahiagum og dakong gisi sa walang bahin sa iyang mata atol sa dominante niyang kadaogan pinaagi sa 8th round TKO batok sa Hapon nga si Kai Ishizawa sa miagi niyang pagkatkat sa ring niadtong Abril dinhi gihapon sa HNU Barder Gym.

"Ako gyud ni siya gipangandaman kay dili basta-basta ako kontra, dili nako ma-underestimate. Ako paningkamotan nga modaog," dugang pa ni Suganob.

Inilog kaayo si Suganob nga nagtangag og 15-1 rekord uban ang 5KOs, apan angayan siyang magmatngon batok sa bisitang Thai nga mipatikangkang og 11 sa 13 niini ka mga biktima uban ang duha pa lamang ka pilde ug duha ka table sa 17 ka                                                                away.

"If nindot iya )Suganob) performance karon, definitely in 2025 we can have the world title fight against the Japanese," dason pa ni PMI Bohol Boxing CEO Atty. Floriezyl Echavez-Podot.

Sa supporting main event, ang way pildeng si WBA Asia super flyweight champion Reymart "Cebuano Assassin" Tagacanao (9-0, 7KOs) sa Carcar City modepensa sa iyang trono batok ni kanhi world champion Phai Pharob (38-6, 29KOs) sa Thailand.

Ang stablemate ni Tagacanao sa Villamor Gym nga si Christian Balunan (11-0, 7KOs),  ang WBO Asia Pacific Youth minimumweight champion gikan sa Consolacion, Cebu,  mopakita sab og aksiyon batok ni three-time world title challenger Robert "Ingo" Paradero (19-8-2, 13KOs).

Sa laing sangka, si WBO Asia Pacific minimumweight champion Jake "El Bambino" Amparo (15-6-1, 3KOs) mosakbang batok i Jayson Francisco (5-7, 1KO).

Lain pang magpinaksitay ning kulbahinam nga pasundayag nga magsugod sa alas-6 sa gabii mao sila si Althea Shine Pores (5-0-1, 1KO) vs Pimchanok Thepjanda (9-6, 6KOs), Sugarey Pores (6-0, 4KOs) vs Justine Darap (11-6, 7KOs), Leonard Pores (4-0) vs Jessie Bell Goltiano (3-4, 2KOs), ug Freshler Utrera vs Noven King Espina.