Bucks naghari sa NBA cup

CEBU, Philippines — Si Giannis Antetokounmpo ug ang Milwaukee Bucks mipahilom sa Oklahoma City Thunder, 97-81, aron langkaton ang korona sa ikaduhang edisyon sa NBA Cup kagahapong adlawa didto sa T-Mobile Arena sa Las Vegas.

Ang two-time MVP nga si Antetokounmpo miharos og triple-double nga 26 puntos, 19 ka rebounds ug 10 ka assists nga iyang gisukipan og duha ka steals ug tulo ka blocks alang sa Bucks, nga milansang og 17 ka 3-pointers aron bughaon ang Thunder ug mosunod sa tunob sa Los Angeles Lakers isip kampiyon sa in-season nga torneyo sa liga.

Mihimo sab og kasikas si Damian Lillard uban ang 23 puntos alang sa Bucks, nga miangkla sa eksplosibo untang Thunder ngadto lamang sa 31 puntos sa second half.

Si Shai Gilgeous-Alexander maoy nangu sa Thunder bitbit ang 21 puntos apan mikonekta og walo lamang sa 24 niya ka itsa. Tam-is ang pamawi ang nakab-ot sa Bucks nga gitagak sa Indiana Pacers sa semifinals sa miaging NBA Cup.

Sila maoy bugtong team gikan sa semis sa miaging tuig nga nakasud og balik sa Final Four didto sa Las Vegas diin ilang gipalagpot ang Orlando Magic sa quarterfinals ug gipasukarap ang Atlanta Hawks sa semis.

Ang kalamposan sa Bucks kabahin sa impresibo nilang pagbalitok human sila kaduha lamang nakadaogan sa nag-una nilang 10 ka duwa ning season. Karon, ang Bucks midaog sa ika-13 nga higayon sa katapusan nilang 16 ka duwa.

Alang ni Antetokounmpo, nga migiya sa Bucks ngadto sa NBA title tulo ka tuig na ang milabay, timaan kini sa mas nindot pang dagan sa ilang kampanya sa umaabot.

"It's great for our team," matud pa ni Antetokounmpo, nga gibayaw nga MVP sa torneyo. "The last 15 games we've played, we've competed. We've played team basketball."

"I'm so proud of this group," dugang pa sa nabantog nga "Greek Freak" "Coming out of halftime we know we have 24 minutes to go, we came out in the third quarter, we set the tone. We played great team basketball."