PPGT-A mipuwersa og knockout Game 3 sa CCICL finals

CEBU, Philippines — Buhi pa ang paglaum sa PPGT-A nga mosakmit sa kampiyonato human makabawos sa SNC-A, 87-75 sa Game 2 sa ilang "best-of-three" finals sa Couples for Christ Inter-Chapter League niadtong Domingo diha sa Casili gym sa Consolacion.

Sa gihapon, ang higanteng si Jonnas Cayanong mao na sab ang nagbangis sa opensa sa PPGT-A nga nipuwersa ngadto sa knockout finals nga gikatakda karong Septiyembre 8. 

Si Cayanong mibagnos og 27 points uban ang 18 rebounds, lima ka blocks ug tulo steals nga igo na kaayo alang kaniya aron ilhong best player of the game.   

Hinugtanay sa bakus ang maong aksyon ug gani ang duha ka karibal nagpuli-puli'g ilog sa labaw sa makadaghang higayon sud sa nag-unang duha ka kuwarter.

Pagtungtong sa ikatulong kuwarter, miburot ang labaw sa PPGT-A human milusad og 8-0 run, apan nihiyos ra sab kini dihang mibawos ang SNC-A aron mapahakan ang labaw ngadto sa dos puntos nga nakapagilok sa duwa.

Sa tuyo nga dili hiapsan, ang PPGT-A hinay-hinay nga miinat sa ilang labaw ug milusad og laing rally sa fourth quarter aron moposte og 13 puntos nga labaw. Nakibhangan sa SNC-A ang labaw ngadto na lang sa sayes puntos sa kapin dos minutos ang nahabilin sa final period, apan didto ra kutob ang ilang maayong labok kay ang PPGT-A mao na man ang nikontrolar sa nahabiling mga oras sa duwa.   

Si Jayfox Owatan mitampo'g 16 puntos sa PPGT-A, si Jonrey Luchavez miamot og 10 puntos, samtang si Roy Ermac nga adunay 13 puntos sa Game-1 miiskor lang og kuwatro puntos.

Ang SNC-A gipangulohan ni Chris Englis nga mikabkab og 26 puntos, gisundan ni Johnson Quilaton nga dunay 16 puntos ug Raymil Fernandez sa iyang 14 puntos.

Mga iskor

PPGT-A ( 87) — Cayanong 27,  Owatan 16, Luchavez 10, Recha 8, Dahuya 8, Abatayo 6, Ermac 4, Bihag 4, Selorio 3, Beron 1

SNC-A (75) — Englis 26, Quilaton 16,  Fernandez 14, Ricamora 7, Remarca 6, Paeste 4, Cahayagan 2.