ARQ-UV Lancers kampiyon sa kalumonan Mayor's Cup

CEBU, Philippines — Ang University of the Visayas (UV) Green Lancers midugang og laing titulo sa mabungahon nilang kampanya ning tuiga.

Gipaluyohan sa ARQ Builders, ang Green Lancers milugwa nga kampiyon sa 9th Kalumonan Festival Mayor's Cup Open Commercial Basketball League niadtong Lunes, Agosto 26, didto sa lungsod sa San Agustin sa Surigao del Sur.

Luyo sa balanse nilang ataki, ang Lancers midominar sa RKR Panabo sa Davao del Norte, 92-74, sa tinagakay nilang final match.

Ang hari sa Cebu Schools Athletic Foundation, Inc. (CESAFI) sa miaging duha ka seasons wala na mahulga pa sukad sila misirit ngadto sa sayong 26-15 nga labaw.

Nakasustinir ang Lancers sa mainit nilang ratsada aron inaton ang ilang bentaha ngadto sa 15 puntos, 76-61, human sa tulo ka kuwarter.

Sukad niadto, ang UV hapsay nga nagnabigar padung ngadto sa 18 puntos nga demolisyon sa RKR Panabo nga gituldokan sa 3-pointer ni Jimpaul Amistoso sa hilimatyong segundos.

Sa paglangkat sa ikalima nilang korona sukad sila nanghawod sa Barangay Bulacao Sinulog Cup Inter-Collegiate Basketball Tournament niadtong Pebrero sa dakbayan sa Sugbo, ang Lancers nakaangkon og dugang motibasyon sa ilang tinguha nga makasakmit og laing "three-peat" sa umaabot nga CESAFI Season 24 nga gikatakdang mosikad karong Septiembre 21 didto sa Cebu Coliseum.