Central Visayas natagak sa ikalimang puwesto

Nalangkatan og korona sa secondary football ug basketball sa Palaro

CEBU, Philippines — Midugang og duha lamang ka golds sa ilang kaban sa usa ka mingaw nga Dominggo, ang Central Visayas nadakin-as ngadto sa ikalimang puwesto sa liderato padung sa katapusang duha ka adlaw sa aksiyon sa 64th Palarong Pambansa.

Human gibira ang unang bulawan ning usa ka semana nga torneyo pinaagi sa 3,000-meter run, ang garbo sa mga Oponganon nga si Asia Paraase sa Pajo National High School sa dakbayan sa Lapu-Lapu misakmit na sab og gold, ning higayona sa 1,500m run sud sa oras nga upat ka minutos ug 51.61 segundos didto sa Cebu City Sports Center kagahapon.

Sa lawn tennis, sila si Mariet Marie Bolongaita sa ABC Learning Center sa Tayasan ug Rousey Dre Paliwag sa Valencia Central Elementary School didto sa Negros Oriental mipugnit og gold sa elementary girls doubles, samtang sila si James Andrio Estrella ug Jye Lexis Villaceran naka-bronze sa elementary boys doubles.

Sa swimming, si Kleone Mole nakapasol og silver sa secondary girls 800m freestyle, samtang si Kacie Gabrielle Tionko midonar og bronze sa 400m individual medley ingon man sila si Quiel Noreen Pilayre ug Aaron Wade Gordoncillo sa 100m breaststroke.

Si Antonette Torregue sa Bayawan City mitampo og bronze sa girls 52 kgs. category sa wrestling.

Bisan pa mang sa ilang paningkamot, ang Region 7 natagak gihapon ngadto sa ikalima sa overall standings uban ang 22 ka golds, 34 ka silver ug 23 bronze sunod sa nagharing National Capital Region (61-47-56), Calabarzon (42-32-36), Western Visayas (39-28-31), ug Davao Region (24-18-21).

Ang labing pait nga kapakyasan nga natilawan sa Central Visayas nagagikan sa mga pambato niini sa basketball ug football.

Sa secondary boys 5x5 basketball, natuldokan ang kampanya sa Region 7 nga madepensaan ang ilang trono human ang University of the Visayas (UV) Baby Lancers miyukbo ngadto sa mag dagko ug mas tag-as nga Central Luzon, 83-88, sa tensiyonado nilang sangka sa quarterfinal match didto sa University of San Carlos (USC)-Main gym.

Ang Central Visayas nakasinati og susamang kapalaran sa secondary football human ang kampiyon sa miaging tuig nga SHS-Ateneo de Cebu Magis Eagles gibuntog sa Western Visayas, 2-4, bisan og sila maoy nakapaslak sa nag-unang duha ka goals sa penalty shootout.

Ang elementary booters sa Don Bosco Technical College (DBTC) maoy nakasalbar sa rehiyon human ilang giserohan ang Northern  Mindanao, 4-0, didto sa ilang balwarti aron pagmartsa ngadto sa semifinal round.