Strong Group tinambakan ang Australia
MANILA, Philippines — Halos hindi pinawisan ang Strong Group-Pilipinas sa pag-iskor ng 91-69 panalo kontra sa BSBL Guardians ng Australia upang manatiling walang galos sa 43rd William Jones Cup kahapon sa Taipei, Taiwan.
Ayaw paawat ni dating PBA champion import mula sa San Miguel Beer na si Chris McCullough nang kumana uli ng 23 puntos at 7 rebounds upang banderahan ang 22-point win ng pambato ng Pinas.
Nauna nang nagpasiklab si McCullough sa pagtabo ng kumpletong 15 puntos, 7 rebounds, 5 assists at 4 steals sa 104-79 panalo nila kontra sa United Arab Emirates.
Umalalay kay McCullough si Gilas Pilipinas naturalized player Ange Kouame na may 16 puntos at 10 rebounds na double-double habang may 14 puntos naman si American big man Tajuan Agee.
May suporta ring 9, 7 at 6 puntos sina Jordan Heading, Dave Ildefonso at RJ Abarrientos, ayon sa pagkakasunod, para sa local crew ni coach Charles Tiu.
Susubok sa 3-0 kartada ang Strong Group kontra sa Ukraine sa alas-5 ng hapon ngayon upang mapalakas ang tsansa sa No. 1 spot na siyang magiging kampeon agad sa 9-team tournament.
Laglag sa 0-2 ang BSBL Guardians matapos ding yumukod sa Future Sports USA, 69-65.
- Latest
