Brownlee nasa FIBA OQT Mythical 5
MANILA, Philippines — Kasama si Gilas Pilipinas naturalized player Justin Brownlee sa All-Star team ng FIBA Olympic Qualifying Tournament na ginanap sa Riga, Latvia.
Pasok si Brownlee sa Mythical 5 kasama sina Tournament Most Valuable Player Bruno Caboclo at Leo Meindl ng Brazil, Rihards Lomazs ng Latvia at Jeremiah Hill ng Cameroon.
Malaki ang ambag ni Brownlee kaya’t umabot sa semifinals ang Gilas sa Olympic qualifiers.
Nagtala si Brownlee ng averages na 23 points, 8.3 rebounds at 6.3 assists upang pamunuan ang Gilas Pilipinas sa kampanya nito sa Latvia.
Magandang konsolasyon ito para kay Brownlee na ibinuhos ang lahat upang tulungan ang Pinoy squad sa torneo.
Mainit ang simula ni Brownlee nang kumana ito ng 26 puntos, siyam na rebounds at siyam na assists nang gulantangin ng Gilas Pilipinas ang world No. 6 Latvia sa pamamagitan ng 89-80 desisyon.
Ito ang unang panalo ng Pilipinas sa isang European team sapul noong 1960 Rome Olympics nang talunin ng Pinoy cagers ang Spain sa iskor na 84-82.
Subalit kinapos lamang ang Gilas Pilipinas sa semifinals matapos umani ng 60-71 kabiguan sa kamay ng Brazil.
Nagkampeon ang Brazil nang ilampaso nito sa finals ang host Latvia, 94-69 desisyon.
Kalakip nito ang tiket ng Brazil sa Paris Olympics na magsisimula sa Hulyo 26 sa France.
Nakalikom lamang ng 15 puntos si Brownlee kontra Brazil.
- Latest
