Meralco kampiyon na gyud!

Misakmit sa unang PBA title sud sa 14 ka tuig

CEBU, Philippines — Luyo sa pagkamabayanihon ni Chris Newsome, gipalukapa sa Meralco Bolts ang San Miguel Beermen sa hingpit uban ang kulbahinam ug makutas nga daog sa Game 6, 80-78, aron langkaton ang labing una nilang kampiyonato sa PBA niadtong Dominggo sa gabii didto sa Smart Araneta Coliseum.

Gihuman sa Meralco ang serye sa baraha nga 4-2.

Gawas nga naghari sa PBA Season 48 Philippine Cup human gipalayas ang Beermen sa ilang trono, gibisbisan sab sa Bolts ang 14 ka tuig nilang huwaw sa titulo sa liga. Sa pagkab-ot nila sa makasaysayanong korona, ang Bolts nag-agi usa og makuyaw nga dalan.

Kini tungod kay mikolapso sila human miposte og 17 puntos nga labaw sa first half.

Sa hinay-hinay, ang Beermen nakagukod hangtud nga nakatabla sa iskor nga 78-78 human sa makapakurat nga 3-pointer sa Sugbuanong higante nga si June Mar Fajardo sa nahibilin nga 3.1 segundos sa duwa.

Apan taliwala sa presyur, si Newsome kalmado kaayong mipasud sa krusyal niyang baseline jumper sa pinal nga usa ka segundo nga nakapahugyaw og maayo sa bagang panon sa Meralco fans didto sa Big Dome.

Duna pa untay katapusang tsana ang Beermen nga magmilagro apan waa masud ang gitira nga tres ni Fajardo dayong kapupos sa oras.

Naglumpayat dayon sa tumang kalipay ang tibuok puwersa sa Bolts nga gipangulohan sa big boss nilang si Manny V. Pangilinan tungod kay nakadimdim na gyud sila sa katam-is sa kampiyonato sukad sila misud sa labing unang propesyonal nga liga sa Asya niadtong 2010.

Si Newsome, nga mitapos uban ang 15 puntos, lima ka rebounds, upat ka assists, ug duha ka steals, maoy gibayaw nga Finals MVP. Dako sab naambag sa kalamposan sa Bolts sila si Allein Maliksi, Bong Quinto, ug Chris Banchero nga nagkumboya'g 35 puntos.

Si Fajardo mipupo og 21 puntos, 12 ka rebounds, ug lima ka assists apan nahoyhoy ang abaga gumikan kay ang Beermen napakyas pagpanalipod sa ilang trono.