Santisima mi-ko ni yupang, misakmit sa WBC Asia title

CEBU, Philippines — Si Jeo "Santino" Santisima mituman sa iyang saad.

Mihimo og impresyon sa iyang pag-away atubangan sa iyang mga katagilungsod sa labing unang higayon, si Santisima  mipalayas ni Thai champion Arnon Yupang sa iyang trono pinaagi sa 4th round knockout aron sakmiton ang World Boxing Council (WBC) Asia Continental super featherweight title sa main event sa "Bakbakan sa Masbate 2" nga gipasiugdahan sa ATK Promotions ni Governor Antonio Kho niadtong Sabado sa gabii, Hunyo 22, didto sa Masbate Lagoon sa Cataingan.

Ang 27-anyos nga si Santisima sa ZIP/Sanman Gym sa General Santos City mi-ataki dayon gikan sa pagsugod ug way poas nga milabay og hait nga mga kinumo ngadto sa ulo bisad tuod og daw wala masakiti niini si Yupang.

Apan ang usa makusog nga left uppercut ni Santisima ngadto sa tiyan nakapahagba ni Yupang sa hingpit sa naghinapos nga bahin sa ikaupat nga hugna.

Si Yupang wala na makabarog pa sa dihang giiphan sa reperi hinungdan nga sayong na-undang ang away sa oras nga 2:01 sa ikaupat nga hugna.

"Una sa tanan, mapasalamaton kaayo ko sa suporta sa tanang mga Masbate os labi na sa among gobernador nga si Tata Tony," matud pa ni Santisima human giinat ang iyang record ngadto sa 24-7 nga gidayan-dayanan na karon og 20KOs. Si Yupang natagak sa 14-5 uban ang 5KOs.

"Mi-focus lang gyud ko sa akong goal nga i-knockout siya (Yupang) ug malipayon kaayo ko nga ako ning nabuhat, "dugang pa sa garbo sa Aroroy, Masbate."Kabahin sa sunod nakong away, ang tanan magdepende ra gyud sa akong promoter. Apan kon dunay big opportunity labi na maka-away ko og world title fight, ako ning dawaton kay damgo gyud ni namo tanan mga boxers."

Nadoble ang kalipay ni Jeo gumikan kay ang manghud niyang si Alex Santisima, Jr. (9-1, 3KOs) sa sayo pa mi-TKO ni Justine "Philippine Tiger" Darap (11-6, 7KOs) sa CDG Sports Center sa Calbayog City, Samar aron paglugwa nga kampiyon sa World Boxing Foundation (WBF) Australasian super flyweight division.

Sa laing bahin, si Michael "Hot N' Spicy" Dasmarinas (35-3-2, 25KOs) sa CamSur Sports Academy mipa-surender ni Jon Jon "Wolverine" Estrada (18-13-1, 14KOs) sa Elorde Fight Team sa Sucat, Para aque pagkahuman sa ikasiyam nga hugna aron birahon ang korona sa Philippine featherweight category.

Sa ubang mga resulta, si Esneth "Hard Hitter" Domingo (20-2, 12KOs) sa ZIP/Samman mipatikangkang ni Enrique Magsalin sa Iloilo sa oras nga 2:38 sa ikaduhang hugna aron langkaton ang WBC Asia flyweight belt, samtang si Alvin Camique (9-2, 4KOs) sa Amoy Gym sa Gensan mibihag Ben "Sniper Ben Fairtex" Ligas (16-5, 10KOs) sa Elorde Stable pinaagi sa 2nd round TKO aron labnihon ang WBF International super flyweight title.