HD Spikers diretso sa semis ng PNVF Champions League
MANILA, Philippines — Binanderahan ng Cignal HD ang dalawa pang tropang nagmartsa sa semifinal round ng Philippine National Volleyball Federation (PNVF) Champions League men’s division.
Nagsalpak si Joshua Umandal ng 19 points mula sa 15 hits, 3 blocks at 1 ace para akayin ang HD Spikers sa 25-15, 25-21, 27-25 paggupo sa PGJC-Philippine Navy sa Pool A kamakalawa sa Rizal Memorial Coliseum.
Ito ang ikalawang sunod na ratsada ng Cignal na naghulog sa Savouge Spin Doctors (1-1), College of St. Benilde (1-1) at Navy (0-2) sa labanan sa ikalawang semis berth.
Pasok din sa semis ang Iloilo matapos talunin ang Philippine Army, 25, 18, 25-22, 25-19, para sa 3-0 kartada sa Pool B sa torneong inorganisa ni PNVF president Ramon “Tats” Suzara.
Humataw si John San Andres ng 17 points para sa D’Navigators at may 11 at tig-10 markers sina Kyle Villamor, Jayvee Sumagsasay at Abdurasad Nursiddik, ayon sa pagkakasunod.
Nasa ilalim ng Iloilo ang VNS Asereht (2-1) na umiskor ng 25-17, 28-30, 25-21, 31-29 panalo sa Air Force patungo sa semifinals.
Tumipa si Charles Segui ng game-high 22 points para sa pagpapatalsik ng Griffins sa Airmen.
Nagdagdag ng tig-21 markers sina Kevin Montemayor at Kenneth Culabat para sa VNS.
- Latest
